Үзәк территориаль идарә инспекторлары Казанның Авиатөзүчеләр районына рейд оештырды

Бүген Татарстан Экология һәм табигый байлыклар министрлыгының Үзәк территориаль идарәсе инспекторлары, санитар-экологик икеайлык кысаларында, Казанның Авиатөзүчеләр районына рейд оештырды. Чапаев урамында төзелә торган балалар бакчасы янындагы территориядә 250 квадрат метр мәйданлы, тулай күләме 150 кубометр булган төзелеш чүп-чары өеме табылды. Үзәк идарә инспекторлары тарафыннан “Бәрәкәт Строй” ҖЧҖнең “Әйләнә-тирәлекне саклау турындагы” Федераль законның 52 статьясын һәм Россия Федерациясе Җир кодексының 42 статьясын бозуына карата административ материал төзелде. Гаеплеләр территорияне ике атна эчендә чистартырга вәгъдә иттеләр.
Санитар-экологик икеайлык башыннан, 1 апрельдән алып Татарстан Экология һәм табигый байлыклар министрлыгының Үзәк территориаль идарәсе инспекторлары 56 тикшерү үткәрде, 35 бозу очрагын ачыклады, 26 беркетмә төзеде.
Министрлыкның матбугат хезмәте