Бүген “Татар-информ”да узган матбугат конференциясендә экологик проектларга грант ярдәме турында сөйләделәр
Бүген “Татар-информ” мәгълүмат агентлыгында гражданлык җәмгыятен үстерүгә Татарстан Республикасы Рәисе грантларын бирүгә конкурс башлану турында матбугат конференциясе узды. Спикерлар булып ТР Иҗтимагый палатасы рәисе һәм гражданлык җәмгыятен үстерүгә ТР Рәисе грантларын бирүгә конкурслар үткәрү буенча республика комиссиясе башлыгы Александр Терентьев, социаль юнәлешле коммерциячел булмаган оешмаларга ярдәм итү буенча Республика ресурс үзәге директоры Зөлфия Сафина һәм ТР Экология министрлыгының мәгълүмат системалары һәм экологик агарту идарәсе башлыгы Дамир Вәлиуллин чыгыш ясады.
Гражданлык җәмгыятен үстерүгә ТР Рәисе грантларын бирүгә Конкурс 1 июльдә старт ала. Ул 21 юнәлеш буенча үткәрелә, шул исәптән әйләнә-тирә мохитне саклау һәм хайваннарны яклау буенча.
Быел программаның гомуми фонды 163 млн сумнан артык тәшкил итә.
Грант конкурсында кем катнаша ала һәм татарстанлыларга нинди экологик проектлар кызыклы булуы турында Дамир Вәлиуллин сөйләде:
“Гомумән алганда, грант ярдәме иң нәтиҗәле ярдәм чараларының берсе. Бу кешеләрне һәм дәүләтне берләштерү буенча зур осталык. Республикада гамәлгә ашырыла торган барлык кызыклы проектларны без күрәбез һәм аларны озата барырга әзер. Түгәрәк өстәлләргә чакырачакбыз, консультацияләр бирәчәкбез һәм бергә эшләячәкбез”.
Гаризалар җыю 14 августка кадәр дәвам итәчәк. Җиңүчеләр октябрьнең соңгы атнасында-ноябрь башында билгеләнәчәк. Гамәлгә ашыруга игълан ителгән һәм хупланган проектлар 2027 елда тормышка ашырыла башлаячак.
Белешмә: 2026 елда Татарстанда грантлар акчаларына “Әйләнә-тирә мохитне саклау һәм хайваннарны яклау” юнәлеше буенча проектлар гамәлгә ашырыла:
- “Татарстанның яшел коды” (РМЭОО “Чиста булачак”, Казан) - 1,25 млн сум.
Проект балалар һәм яшьләр арасында туган як турында белем дәрәҗәсен күтәрүгә, шулай ук табигатьне саклау чараларына җәлеп итүгә һәм патриотизмны үстерүгә юнәлдерелгән. Чаралар “Экологик иминлек” милли проектына ярдәм йөзеннән үткәрелә.
- “Без җавапта” (“Өмет йорты” Хәйрия Фонды, Түбән Кама) - 1,99 млн сум.
Массакүләм стерильләштерү һәм кастрация аша йортсыз хайваннар санын гуманлы ысуллар белән киметү, шулай ук яшь буында хайваннарга җаваплы мөнәсәбәт формалаштыру проекты.