Татарстанда Укытучы музее ачылды
Һөнәри бәйрәм — Укытучылар көне алдыннан Василий Дементьев (Алешкин-Саплык авыл җирлегендә мәгариф системасына нигез салучы, ике тапкыр Социалистик Хезмәт Герое, тугыз Ленин ордены кавалеры һәм Сталин премиясе лауреаты, СССР Авиация министры Петр Дементьевның әтисе) исемен йөртүче Алешкин-Саплык мәктәбендә Укытучы музее ачылды. Идея – мәктәпне тәмамлаучыларныкы.
«Без – 120 елдан артык булган әлеге мәктәпне тәмамлаучылар – Укытучы музеен төзергә һәм шул рәвешле укытучыларыбызның барлык буыннарына рәхмәт белдерергә булдык. Аларның хезмәтләрен бәяләвебезне күрсәтергә һәм рәхмәтебезне белдерергә, — дип сөйләде Чүпрәле районында туып үскән, мәктәпне тәмамлаучыларның берсе, Татарстанның экология һәм табигать ресурслары министры Александр Шадриков.
Элек бу зур булмаган бинада Туган якны өйрәнү музее һәм Дементьев исемендәге музей урнашкан була. 9 майда әлеге ике музейның киңәйтелгән экспозициясен Татарстан Республикасы Рәисе Рөстәм Нургали улы Миңнеханов ярдәме белән ремонтланган ике катлы авыл мәдәният йортында тантаналы рәвештә ачу чарасы булды. Ә мәктәптә бушаган мәйданчыкта «Укытырга — укырга. Иҗат итәргә» музеен ачарга карар кылынган.
Килүчеләрне керү урынында ук СССР чоры формасындагы озын буйлы укучылар каршы ала. Стендларда төрле еллардагы язу әсбапларын, уку әсбапларын, шул исәптән физика, астрономия, информатика һәм программалаштыру буенча уникаль булган мәктәп педагоглары кулы белән иҗат ителгән әсбапларны күрергә мөмкин. Ә менә монда, музей диварында, хәзер елдан-ел үсә торган, үз төрендәге бердәнбер «Чыгарылыш сыйныф укучылары агачы» җәелгән.
«Һәркем үз укытучысының кадерен белергә тиеш. Һәрберебезнең шәхесен формалаштыруга керткән өлеше зур булган укытучы һөнәренең абруен кайтарырга кирәк! Беренче чиратта, бу кеше ала торган белем, бу тәрбия һәм, әлбәттә, ул мәктәптә алган белемнәргә таянып алачак үсеш», — дип билгеләп үтә экология министры.
Бу мәктәпне тәмамлаучылар тиешле һөнәр алгач, монда туганнарның күбесенең кече ватаннарына кайтырга теләве бик мөһим, дип ышаналар.
«Аларның берәрсе эшкуар булырга теләр. Бик яхшы! Ә иң яхшы чыгарылыш укучылары, минемчә, туган якларына укытучы, остаз, педагог булып кайтырга тиеш. Безнең бурыч – уңышка ирешсеннәр һәм кече ватаннарын, республикаларын, илебезне көчлерәк итсеннәр өчен аларга ничек ярдәм итәргә икәнен уйлап табу. Феофан атакайның: «Кече Ватаныбызны торгызып, без бөек Россияне торгызабыз», — дигән матур сүзләре бар, һәм мин алар белән тулысынча килешәм», - ди Александр Шадриков.