«Экоселфи – селфи файда белән 2025» конкурсында катнашырга өлгерегез!
Томск өлкәсе Төньяк-Көнчыгыш Азия илләренең төбәк администрацияләре ассоциациясенең экология буенча кече комиссиясе белән хезмәттәшлектә «Экоселфи – селфи файда белән 2025» халыкара экологик конкурсында катнашырга чакыра. Конкурска сез өмәләрдә, чүп-чарны аерым җыю акцияләрендә катнашуыгызны, әйберләрне кабат куллану практикасын, хәрәкәт итүнең экологик ысулларын һәм көндәлек тормышыгызда кулланган башка файдалы эко-гадәтләрегезне күрсәтүче фотосурәтләрне тәкъдим итә аласыз.
Конкурс өч номинацияне үз эченә ала:
«Экоэш» - номинация сез төрле табигатьне саклау акцияләрендә катнашканда ясалган селфилар өчен каралган. Бу агач утырту һәм аларны карау, парк территорияләрен, сулыкларны, табигать һәйкәлләрен һәм башка объектларны чүп-чардан чистарту, шулай ук кыргый һәм йортсыз хайваннарга һәм кошларга ярдәм итү булырга мөмкин.
«Экогадәтләр» - бу номинациядә сез үзегезнең экологик яшәү рәвешегез принципларын чагылдырган фотосурәтләрне тәкъдим итә аласыз. Бу химик чаралар урынына натураль чаралар куллану, ресурсларны саклау принципларын күрсәтү, хәрәкәт итү ысулларын оптимальләштерү, калдыкларны сортларга аеру һәм эшкәртү булырга мөмкин.
«Экоиҗат» - номинация эшкәртү нәтиҗәсендә яңа тормыш алган иске һәм кирәксез әйберләрдән ясалган селфига багышланган. Сез эшкәртелгән материаллардан ясалган сумкалар, келәмнәр, уенчыклар һәм көнкүрештә файдалы башка әйберләрнең фотосурәтләрен тәкъдим итә аласыз. Шунысын да билгеләп үтәргә кирәк, интерьер эшләнмәләре, шулай ук бакча-яшелчә һәм парк скульптуралары конкурста катнашуга алынмый.
Конкурста катнашу өчен 17 ноябрьгә кадәр үз эшеңне яндекс-форма аша җибәрергә кирәк: https://forms.yandex.ru/cloud/67f8b54302848fb5b272a9c8/?clckid=5557f813.