Әтнә районы укучылары елга һәм күлләрнең кыйммәте турында белделәр

2025 елның 29 мае, пәнҗешәмбе

Экология министрлыгының Төньяк идарәсе инспекторлары Әтнә районының Бәрәзә мәктәбе укучылары өчен су ресурсларына һәм зур елга – Иделгә багышланган мавыктыргыч экодәрес үткәрделәр. «Ашыт» дәүләт тыюлыгы белгечләре белән берлектә, инспекторлар Идел турында кызыклы фактлар турында сөйләделәр: елганың озынлыгы, аның башы кайда, елгага ничә кушылдык коя, Идел суларында нинди балыклар тереклек итә. Моннан тыш, белгечләрдән укучылар көндәлек тормышта су ресурсларын саклау ысуллары турында белделәр.

Очрашу азагында экологлар балаларга флешмоб тәкъдим иттеләр: һәрберсе тасманың кечерәк кисәгенә елгаларның исемнәрен язды, ә аннары аларның барысы бергә кушылып, Россиянең барлык су артерияләреннән бер зур чылбыр ясалды.