26 май – Алтайда ак барс көне
Бүген, 26 майда, Алтайда ак барс көне оештырылуга 15 ел тулуны билгеләп үтәләр. Бу бәйрәм Үзәк Азиянең биек таулы районнарында яшәүче мәчеләр гаиләсенең сирәк очрый торган вәкиле – ирбисны саклап калу зарурлыгына игътибарны җәлеп итәргә тиеш.
Ак барс Татарстан Республикасы өчен аеруча әһәмиятле. Аның туган җирнең көчен, намуслылыгын һәм яклануын символлаштырган сурәте республиканың дәүләт гербында бар һәм ул берничә оешманың эмблемасы булып тора.
Биологик төрлелекне саклау максатларында, 2022 елда Татарстан Республикасы Рәисе Рөстәм Миңнеханов инициативасы белән һәм Россия Федерациясе Табигать ресурслары һәм экология министрлыгы ярдәмендә «Ак барс» фәнни үзәге төзелде. Алтай Республикасының «Карым» территориясендә урнашкан үзәктә хәзерге вакытта Кыргызстаннан өч ирбис: ата мәче Батыр һәм ана мәче Жаниш, шулай ук ана мәче Умай асрала. Монголия белән хезмәттәшлек кысаларында тагын ике затның килүе көтелә.
Казан 2025 елның мартында ак барсны саклау буенча халыкара конференция уздыру мәйданчыгына әйләнде. Тарихта беренче тапкыр ирбис яшәү ареалының барлык 12 иленең вәкилләре бу сирәк ерткычны саклау буенча актуаль мәсьәләләр турында фикер алышу өчен җыелды. Конференция нәтиҗәләре буенча ирбисны яклау өлкәсендә халыкара җәмәгатьчелекнең көчләрен берләштерүгә юнәлдерелгән Казан резолюциясе кабул ителде.
Татарстан Экология һәм табигать ресурслары министрлыгы барысын да Ак барс көне белән котлый!
Белешмә өчен:
Ак барс (Ирбис) Халыкара табигатьне саклау берлегенең Кызыл исемлегенә кертелгән һәм үз ареалының барлык 12 илендә дә юкка чыгу куркынычы астында тора. Россиядә 90га якын ак барс исәпләнә, аларның күбесе Алтай Республикасындагы «Сайлюгем» милли паркы территориясендә яши.