Буа районында «Агач утырт» акциясендә катнашучылар 9 мең үсенте утыртты
Кече Буа авыл җирлеге территориясендә Экология министрлыгының Идел аръягы идарәсе белгечләре Буа урманчылыгы, Биоресурслар буенча дәүләт комитеты вәкилләре, «Буа газы» хезмәткәрләре, ТР Аучылар һәм балыкчылар җәмгыяте һәм волонтерлар белән берлектә «Агач утырт» экологик акциясен үткәрделәр. Катнашучылар 9 мең ылыслы агач утырттылар.
3 гектардан артык территориядә утыртылган яшь наратлар әйләнә-тирә мохитне саклаучы һәм елның салкын вакытында да кислород җитештерүче искиткеч агачларга әвереләчәк. Табигатькә ярдәм итүдә уртак көчләрне берләштерү – экологик хәлгә мөһим өлеш кертү. Агач утырту – үзең турында истәлек калдыру, тирә-юньдәгеләргә шатлык бүләк итү дигән сүз. Шул рәвешле, төрле ведомстволар һәм оешмалар хезмәткәрләре «Экологик иминлек» илкүләм проектының максатларын хуплый.