Без хәтерлибез: ТР Экология министрлыгында «Җиңү диктанты» язылды
«Җиңү диктанты» традицион халыкара тарихи-патриотик акциясе инде җиденче ел уза. 2019 елда акция 24 илдә старт алды, 150 меңнән артык кешене берләштерде. Берничә ел эчендә истәлекле чараның аудиториясе 2 миллионга кадәр арткан. 2025 елда оештыручылар 80 илдән 2,5 миллион катнашучыны көтә. Акциягә беренче тапкыр Кытай, Куба, Ирландия, Швеция, Швейцария, Норвегия, Сингапур, Корея Республикасы, Хәбәшстан, Шри-Ланка һәм Кипр кушылачак.
Бүген үк «Җиңү диктанты»н ТР Экология министрлыгы хезмәткәрләре дә язды. Белемнәрен тикшерергә һәм мөһим тарихи вакыйгаларга хөрмәт күрсәтергә теләүчеләрне экология министрының беренче урынбасары Илнур Гобәйдуллин сәламләде. Хезмәткәрләр 25 сораудан торган тест үткәрделәр. «Диктант»ның тематикасы төп сугышларны һәм Бөек Ватан сугышы геройларын, легендар корал һәм бүләкләрне, сугыш белән бәйле сәнгать һәм мәдәният әсәрләрен үз эченә ала. 2025 елда сорауларның бер блогы махсус хәрби операция вакыйгаларына багышланган.
Бүгенге көндә акциядә катнашу өчен 35 мең нокта теркәлгән, шуларның 250 дән артыгы – башка илләрдә. Татарстан Республикасында 390 дан артык мәйданчык теркәлгән. «Җиңү диктанты»н уздыру инициаторлары – «Бердәм Россия» партиясе, Россия хәрби-тарихи җәмгыяте, Россия Тарихи Җәмгыяте һәм «Җиңү волонтерлары» Бөтенроссия иҗтимагый хәрәкәте.