Экология министрлыгы инспекторлары 3 районда чүплекләр таптылар

2025 елның 15 апреле, сишәмбе

Идел аръягы идарәсе инспекторлары санитар-экологик икеайлык кысаларында Чүпрәле, Кайбыч һәм Тәтеш районнарын тикшерделәр. Нәтиҗәдә Кече Чынлы, Яңа Чүпрәле, Зур Кайбыч, Кошман авыллары һәм Тәтеш шәһәре территорияләрендә гомуми мәйданы 81 кв.м булган рөхсәтсез чүплекләр ачыкланды.

Калдыкларны рөхсәтсез җыю урыннары табылган районнарның башкарма комитетлары адресына табигатьне саклау законнарын үтәү һәм бозуларны бетерү кирәклеге турында кисәтүләр җибәрелде.