Чүпрәле районында «Чиста булачак» экофорумы узды
Татарстан Республикасының «Чиста булачак» хәрәкәте «Һәр почмакка чиста булачак» проектының икенче сезонын дәвам итә. Проектның дүртенче экологик агарту форумы Чүпрәле районында узды.
Тармак технологияләре техникумына 15 мәгариф учреждениесеннән 84 экоактивист җыелды.
Эшлекле очрашуда ТР Экология министрлыгының экологик агарту һәм иҗтимагый оешмалар белән элемтә бүлеге әйдәүче белгече Энҗе Дмитриева, район башкарма комитеты вәкиле Газинур Хәлиуллов, техникум директоры Фәнил Яфизов, «Зөя буйлары» табигать тыюлыгы белгече Лилия Зарипова катнашты.
Катнашучылар республиканың һәм хәрәкәтнең экологик проектлары турында белделәр, шулай ук аерым оешма вәкилләре үз чаралары тәҗрибәсе турында сөйләделәр. Форумда экологик агарту практикаларына, экологик бергәлек үсешенә һәм табигать өчен файдалы көнкүреш гадәтләренә багышланган интерактив мәйданчыклар эшләде. Катнашучылар «#Зеленая командаБЧ. Будущее в зеленом» форсайт-сессиясендә яңа проектлар өчен идеяләр тудырдылар.
Ахырда тантаналы бүләкләү булды, анда район активистлары һәм форумда иң яхшы катнашучылар билгеләп үтелде.
Форум ТР Экология министрлыгы ярдәмендә уза һәм «Экологик иминлек» илкүләм проектының максатларын хуплый, шулай ук гражданлык җәмгыятен үстерүгә Татарстан Республикасы гранты акчасына гамәлгә ашырыла.