Иң кечкенәләр өчен Татарстан елгалары буенча экология дәресләре
Көньяк-Көнчыгыш идарәсе инспекторлары Лениногорскиның 5 нче балалар бакчасында «Республикабыз елгалары» дигән экология дәресен үткәрделәр. Балалар суның барлык тереклек өчен файдасы, су объектларына ни өчен сакчыл һәм ихтирамлы карарга кирәклеге, елга һәм күлләрнең кеше һәм табигать тормышында нинди роль уйнавы турында белделәр.
Экологлар бакчада тәрбияләнүчеләр өчен төрле биремнәр әзерләгәннәр иде: су турындагы мәкальләрне һәм әйтемнәрне искә төшерергә, табышмакларга җавап табарга, «Елгалар, күлләр, диңгезләр һәм океаннар» викторинасы сорауларына җавап бирергә. Балалар экологлар белән бергә сулыкларны чиста тоту өчен һәр кешенең нәрсә эшли алуы турында фикер алыштылар.
Балалар инспекторлар өчен дә чыгыш әзерләгән иде һәм "Бабай бакчасы" экологик әкиятен күрсәттеләр. Чара азагында барлык катнашучылар да ТР Экология министрлыгыннан төсле буяу китапларын алдылар.