Бәләкәй табигать сөючеләр өчен экодәрес!
Бөгелмәнең 15 нче «Светлячок» балалар бакчасында «Безнең якларда кышлаучы кошлар» дигән мавыктыргыч экология дәресе узды. Бу тема белән бакчада тәрбияләнүчеләрне Экология министрлыгының Көньяк-Көнчыгыш идарәсе инспекторлары таныштырды.
Алар балалар белән туган якларында кышларга калучы кошларның төрләре, кыш вакытында азык эзләүнең кыенлыклары һәм кошларга кешедән ярдәм итү мөмкинлеге турында әңгәмә үткәрделәр. Мәсәлән, кешеләр алдан ук азык әзерләргә һәм җимлекләрне элеп куярга тиеш. Безнең җирлектә аеруча еш очрый торган һәм Россиядә яши торган кошлар турында балалар бик күп яңалыклар белделәр. Белемнәрен ныгыту өчен идарә инспекторлары уен-викторина үткәрделәр.
Хәзер инде бәләкәй табигать сөючеләр канатлы күршеләребезне ничек дөрес кайгыртырга икәнен беләләр: алар өчен оялар корырга, ашатырга кирәк, бигрәк тә кыш көне. Инспекторлар белән бергә балалар бакчасы территориясендәге буш җимлекләрне дә тутырдылар.