Экология министрлыгының Фәнни-техник советында Татарстан Республикасында эчәр су белән тәэмин итү һәм җир асты суларын мониторинглау турында фикер алыштылар
Экология министрлыгында Фәнни-техник советның җир асты байлыкларыннан файдалану секциясе утырышы узды. Утырышта халыкны чиста эчәр су белән тәэмин итүгә һәм җир асты суларының торышын мониторинглауга кагылышлы ике мөһим мәсьәлә каралды. Эшләр «Әйләнә-тирә мохитне саклау, табигать ресурсларын торгызу һәм файдалану» дәүләт программасы кысаларында «ТР Геоүзәге» ДБУ тарафыннан башкарылды.
Югары Ослан районының Матюшино һәм Бакча-Сарай торак пунктлары өчен эчәр су чыганакларын эзләүгә һәм бәяләүгә юнәлдерелгән җир асты байлыкларын геологик өйрәнү проекты кысаларында «Росгеолэкспертиза» ФДКУ Идел буе территориаль бүлегеннән уңай эксперт бәяләмәсе алган тикшеренүләр үткәрелде. Проект Министрлыкның Фәнни-техник советы тарафыннан расланды.
Өч этаптан торган эшләр (әзерлек, кыр һәм камераль) архив белешмәләрен җыю һәм эшкәртүне, кыр тикшеренүләрен һәм йомгаклау геологик хисабын төзүне үз эченә ала. Көтелгән нәтиҗә – җир асты суларының расланган запаслары тәүлегенә 200 куб. ким түгел. (Матюшино өче тәүлегенә 100 куб.м., Бакча-Сарай өчен тәүлегенә 100 куб.м.). Эшләрне 01.12.2025 кадәр тәмамлау планлаштырыла.
Шулай ук Фәнни-техник совет утырышында 2024 елда җир асты сулары мониторингы нәтиҗәләре турында хисап тәкъдим ителде. Режим күзәтүләре нигезендә 2025 елга фаразлап, Казан шәһәрендә җир асты суларының гидродинамик торышына бәя бирелде. Хисапта Татарстан Республикасы территориясендәге су белән тәэмин итү чыганаклары (җир асты сулары һәм чишмә сулары) турындагы мәгълүмат системалаштырылган, 2024 елда җир асты суларының ресурс базасы үзгәрешенә анализ ясалган.
2024 елның 1 октябренә республикада расланган запаслары тәүлегенә 2 400,572 мең м3 булган 542 төче җир асты сулары ятмалары һәм ятмалар участогы тикшерелгән. 01.10.2023 башлап 01.10.2024 кадәр эксплуатация запаслары үсеше тәүлегенә 13,439 мең м3 тәшкил иткән. (10 яңа чыганак һәм участок). Җир асты суларының барланган эксплуатация запаслары белән тәэмин ителеше 1 кешегә (01.01.2024 карата) тәүлегенә 0,60 м3 тәшкил итә.
Министрлыкның Фәнни-техник советы тарафыннан мониторинг турында хисап кабул ителде.