Татарстанның экологик талантлары: «Профессионаллар» төбәк чемпионаты нәтиҗәләре
Бүген Зеленодольск районының 5 нче гимназиясендә «Профессионаллар» һөнәри осталык чемпионатының төбәк этабында «Әйләнә-тирә мохитне саклау – Юниорлар» компетенциясе буенча җиңүчеләрне бүләкләү тантанасы узды. 3 февральдән 6 февральгә кадәр Татарстанның 9 яшь экологы өч көнлек киеренке ярыш кысаларында үзләренең белемнәрен һәм күнекмәләрен күрсәттеләр. Катнашучылар катлаулы экологик бурычларны хәл иттеләр, тавыш дәрәҗәсен үлчәделәр һәм әйләнә-тирә мохитне саклауның башка практик аспектларында үзләренең осталыкларын күрсәттеләр.
Каты көрәш нәтиҗәсендә җиңүчеләр билгеләнде:
* 1 урын: Измәгыйлова Айгизә Ленар кызы (Татарстан Республикасы Зеленодольск муниципаль районының 5 нче гимназиясе)
* 2 урын: Нәҗметдинова Зәмирә Айрат кызы (Татарстан Республикасы Зеленодольск муниципаль районының С.К.Гыйматдинов исемендәге Осиново гимназиясе)
* 3 нче урын: Софронов Тимур Игоревич (Татарстан Республикасы Зеленодольск муниципаль районының Нурлат урта гомуми белем бирү мәктәбе)
Җиңүчеләрне бүген экология министры урынбасары Ольга Манидичева котлады. Ул балаларга алга таба уңышлар теләде. «Сезнең белемегез һәм табигатьне саклауга омтылуыгыз – экологик яктан имин Татарстанның киләчәк нигезе. Бездә шундый экологик-грамоталы һәм аңлы буын үсүенә шат», – дип билгеләп үтте экология министры урынбасары.
«Әйләнә-тирә мохитне саклау — Юниорлар» компетенциясе буенча «Профессионаллар» чемпионатының региональ этабы - «Экологик иминлек» илкүләм проектын гамәлгә ашыру кысаларында Татарстан Республикасында экология белемен үстерүдә тагын бер мөһим адым һәм әйләнә-тирә мохитне саклау өлкәсендә булачак белгечләр өчен стимул.