Республика балалар рәсемнәре конкурсы: Ак барсны бергәләшеп саклыйк!
«Дөньяда ак барсны өйрәнү һәм саклау. Көчләрне берләштерү» халыкара конференциясе кысаларында Татарстан Республикасы Экология һәм табигать ресурслары министрлыгы сәнгать мәктәпләре арасында экологик рәсемнәр конкурсы үткәрә. Конкурс 3 февральдә старт ала һәм 2025 елның 28 февраленә кадәр дәвам итәчәк.
Конкурсның төп максаты – үсеп килүче буынның игътибарын ак барсны һәм аның яшәү тирәлеген саклау проблемасына җәлеп итү. Министрлык бу сирәк ерткычны саклау мөһимлеге турында хәбәрдарлыкны арттырырга һәм биотөрлелекне саклау эшендә халыкара хезмәттәшлекне ныгытырга омтыла. Конкурс «Экологик иминлек» илкүләм проекты кысаларында хайваннарның сирәк һәм юкка чыга торган төрләрен саклау буенча Министрлык стратегиясенең мөһим өлеше булып тора.
Катнашуга бөтен республикадан яшь рәссамнар чакырыла. Конкурска теләсә нинди техникада (төсле карандашлар, буяулар, балавыз акбур һ.б.) А3 яисә А4 форматындагы кәгазьдә ясалган рәсемнәр кабул ителә. Катнашучыларга түбәндәге темалар тәкъдим ителә: «Таулардагы ак барс», «Ак барс турында мифлар һәм риваятьләр», «Кеше белән ак барсның үзара бәйләнеше» һәм «Ак барсның киләчәге».
Эшләр 2025 елның 28 февраленә кадәр түбәндәге адрес буенча кабул ителә: 420049, Казан ш., Павлюхин ур., 75, каб.108. Конкурс турындагы нигезләмә белән Министрлык сайтында танышырга була: https://eco.tatarstan.ru/konkurs-risunkov-v-ramkah-mezhdunarodnoy.htm.
Конкурста катнашыгыз һәм киләчәк буыннар өчен ак барсны саклап калырга ярдәм итегез! Сезнең рәсемнәрегез бу гаҗәеп хайванның матурлыгы һәм әһәмияте турында сөйләсен!
Белешмә: Татарстан Республикасы Экология һәм табигать ресурслары министрлыгы ак барсны саклау мәсьәләләре белән шөгыльләнә. 2022 елдан ведомство Татарстан Рәисе кушуы буенча «Ак барс» биологик төрлелекне саклау үзәген төзи. Фәнни үзәк төзелеше хайваннар яши торган табигый ареалларның берсе булган Алтай Республикасы территориясендә алып барыла.