Татарстанның яшь экологлары канатлы дуслары турында кайгырта

2025 елның 22 гыйнвары, чәршәмбе

«Кышын кошларны ашатыгыз!» акциясе кысаларында Татарстан балалары канатлы дуслары турында чын кайгыртучанлык күрсәтте.  

Әлки районының «Ромашка» балалар бакчасына йөрүче балалар һәм Чистайның 5нче мәктәбе укучылары табигатьне саклау акциясендә актив катнаштылар. Балалар үз куллары белән уңайлы җимлекләр ясап, аларны тәмле азык белән тутырдылар һәм, чын кош ашханәләре булдырып, агачларга элеп чыктылар. 

Бу акция кошларга кышкы салкыннарны кичерергә ярдәм итеп кенә калмыйча, үсеп килүче буында табигатькә мәхәббәт һәм әйләнә-тирә мохитне саклау өчен җаваплылык хисе тәрбияли, бу исә «Экологик иминлек» илкүләм проекты максатларына ирешүгә ярдәм итә.