Ахтырка елгасын төзекләндерүнең беренче этабы төгәлләнде
Алексеевск районында Ахтырка елгасында су агымын җайга салу чарасының 1 нче этабы төгәлләнде. Проект су объектларын саклауга һәм суларның тискәре йогынтысын булдырмауга юнәлдерелгән республика чаралары исемлегенә кертелгән һәм «Татарстан Республикасы әйләнә-тирә мохитен саклау, табигать ресурсларын торгызу һәм алардан файдалану» дәүләт программасы кысаларында гамәлгә ашырыла. Финанслау суммасы 46,8 млн.сум тәшкил итә.
Бүгенге көндә яр буйларын төзекләндерү эшләре башкарылган: ярларны таш (вак таш) белән җәеп, чистартып һәм ныгытып торганнар. Чара 3 этапка бүленгән, эшләр киләсе елда да дәвам итәчәк.
Республика экология программасы кысаларында Идел-Кама төбәгендә тагын бер объект яңартыла. Спас районының Никольское авылы янындагы Бездна елгасындагы буаның гидротехник корылмасына капиталь ремонт ясала. Эшләрне башкаруга 8 млн.сум бүлеп бирелгән.
Уздырыла торган чаралар су объектларын саклап калуга һәм савыктыруга, шулай ук гражданнарның яшәү шартларын яхшыртуга ярдәм итә, бу «Экология» илкүләм проектының төп максатларының берсе булып тора.