Казанышлары меңнәрчә исәпләнгән хәрәкәт. «Чиста булачак» елга йомгак ясады
«Московский» мәдәни үзәгендә «Чиста булачак» яшьләр экологик хәрәкәтенең республика фестивале узды. Республика министрлыклары һәм ведомстволары вәкилләре экоактивистларның казанышларын һәм уңышларын билгеләп үттеләр.
Соңгы елларда «Чиста булачак» 6850 экологик чара үткәргән, шул исәптән территорияләрне җыештыру, шәһәрләрне яшелләндерү һәм башка инициативалар буенча да. 3650 дән артык экологик агарту чарасы гражданнарның әйләнә-тирә мохитне саклау турында хәбәрдарлыгын арттыруга юнәлдерелгән. Әлеге тырышлык нәтиҗәсендә хәрәкәт 265 меңнән артык кешенең игътибарын җәлеп итте, ә активистларның үзләре 10 меңнән артып китте.
Сезонны уңышлы уздыру белән республиканың иң масштаблы экологик хәрәкәтен ТР экология министры Александр Шадриков котлады. «Монда барысыннан да күбрәк эшләүчеләр җыелды һәм үз артыннан яшь энергияле кешеләрне алып бара. Сезнең сафларда хәзер 10486 кеше – ул көн саен ниндидер яхшылык эшләүче һәм дөньяны бераз яхшырак итәргә омтылучы тулы бер армия, игелекле кешеләр армиясе», - дип билгеләде ул.
Фестиваль хәрәкәт әгъзаларының эшенә йомгак ясау һәм 2025 елга төп юнәлешләрне билгеләү мәйданчыгына әверелде. Иң мөһим проектларның нәтиҗәләре күрсәтелде, иң яхшы экоактивистларны бүләкләүгә аерым игътибар бирелде.
«Экологик сезон тәмамланганда без ел саен бер-беребезгә «рәхмәт» әйтү өчен очрашабыз. Беребез өчен беребез булуына, эшләгәнебез өчен рәхмәт. Республикабыз, илебез, табигатебез хакына, беренче чиратта, көн саен кылган гамәлләребез өчен. Барыгызга да хәрәкәтебезгә, идеологиябезгә һәм төп миссиябезгә тугры булуыгыз өчен рәхмәт», - дип мөрәҗәгать итте катнашучыларга Татарстан Республикасында «Чиста булачак» хәрәкәте җитәкчесе Диләрә Сатикова. Сүз уңаеннан, бүген хәрәкәтне 10 елга якын җитәкләгән Диләрә Сатикованы алыштырачак оешманың яңа җитәкчесе билгеле булды. Постка 2017 елдан иҗтимагый һәм экологик эшчәнлек белән актив шөгыльләнүче Анна Баймяшкина сайланды.
Татарстан Республикасында экологик иҗтимагый хәрәкәтне үстергән, экологик культураны формалаштыруга һәм үсеп килүче буынга экологик тәрбия бирүгә керткән зур шәхси өлеше өчен Диләрә Сатикова ТР Экология һәм табигать ресурслары министрлыгының Мактау грамотасы белән бүләкләнде. «Сез булдырдыгыз!» - дип билгеләп үтте хәрәкәтнең беренче җитәкчесен бүләкләп, Александр Шадриков. Хәзер ирешелгәннәрнең барысын да арттырырга кирәк, дип ассызыклады ул.