«Ата-аналарга – балаларының уңышлары өчен горурлык, укытучыларга – нәтиҗәле эш һәм сабырлык!» Татарстанның Экология министрлыгы башлыгы Нурлат балаларын республика Рәисе исеменнән Белем көне белән котлады
Бүген Нурлат укучылары һәм укытучылары белән бергә Татарстанның экология министры Александр Шадриков һәм Нурлат районы башлыгы Дамир Ишкинеев ике мөһим вакыйганы билгеләп үттеләр. Алар укучыларны, аларның ата-аналарын һәм укытучыларны яңа уку елы башлануы белән котладылар, аларга уңышлар һәм яңа казанышлар теләделәр, шулай ук капиталь ремонттан соң шәһәр мәктәбен ачтылар.
Александр Шадриков ТР Рәисе Рөстәм Миңнехановның Белем көне уңаеннан мөрәҗәгатен укыды.
«Татарстанда бирелә торган белем – илдә иң яхшыларның берсе. Әлбәттә, монда төп казаныш – безнең педагогларыбызныкы... Республика җитәкчелеге киләчәктә дә уку йортларын модернизацияләү һәм заманча җиһазлау өчен барлык кирәкле шартларны тудырачак... Бу көн беренче кыңгырау белән ачышлар һәм иҗади казанышлар дөньясына ишекләрен ачачак беренче сыйныф укучылары өчен үзенчәлекле һәм истә калырлык булачак. Ышанам ки, сез ышанычлы дуслар табарсыз һәм кыйммәтле белем алырсыз, ә мәктәп сезнең өчен чып-чын туганыгызга әйләнер... Барлык укучыларга һәм студентларга укуда тырышлык һәм яңа казанышлар, ата-аналарга – балаларның уңышлары өчен горурлык, укытучыларга нәтиҗәле эш һәм түземлек телим! Яңа уку елы якты һәм уңай эмоцияләр бүләк итсен, уңыш, ачышлар шатлыгы китерсен», – диелә Татарстан Рәисенең котлау текстында.
Александр Шадриков балаларны һәм педагогларны үз исеменнән дә котлады, беренче сыйныф укучыларына бүләкләр тапшырды һәм яңа уку елында уңышлар теләде.