Александр Шадриков: «Самосыр чүплеген рекультивацияләгәннән соң, без бу районда һава сыйфатына карата шикаятьләр алмыйбыз»
Дәүләт Думасында хөкүмәт эше турында еллык хисап белән чыгыш ясаганда, РФ премьер-министры Михаил Мишустин, аерым алганда, экология һәм әйләнә-тирә мохитне саклау өлкәсендәге карарлар турында сөйләде. Ул «Экология» илкүләм проекты кысаларында бөтен ил буенча тупланган 200ләп экологик зыян объекты юкка чыгарылуын әйтте.
Алар арасында республиканың Түбән Кама районы Прости авылындагы чүплек, шулай ук Минзәләдәге чүплек һәм Казандагы Самосыр чүп полигонындагы чүплек рекультивациясе бар. «Бу – тупланган зыянның иң зур объектлары, – дип билгеләп үтә ТР экология һәм табигать ресурслары министры Александр Шадриков. – Самосыр полигонын бетерү буенча эш 2023 елда тәмамланды, аның гомуми бәясе 872 млн сум тәшкил итте».
Республика Табигать министрлыгы башлыгы искәрткәнчә, Самосырны рекультивацияләү бурычы, беренче чиратта, Казан халкы тарафыннан куелган. «2021 елда гына да безнең министрлыкка һава сыйфаты турында 300дән артык шикаять килде. Әлеге объектны өч ел эчендә Татарстан республикасы Рәисе Рөстәм Миңнеханов һәм экология буенча Федераль министрлык ярдәме белән тормышка ашыра алдык. Проект Россия вице-премьеры Виктория Абрамченконың югары бәясен алды: ул аның бөтен ил өчен флагман булуын билгеләп үтте. Без полигонны рекультивацияләүдә кулланган технологияләр илнең башка төбәкләрендә дә кулланылыр дип ышанам».
Проектны гамәлгә ашыруның төп нәтиҗәсе дип Александр Шадриков халыкның иминлеген саный. «Самосыр полигонын рекультивацияләү тәмамланганнан соң, Казанның бу өлешендә яшәүчеләрдән һава сыйфатына карата шикаятьләрне башка алмыйбыз», – ди ул. Министр «Чиста ил» урынына «Генераль өмә» килүен искәртте. Каты көнкүреш калдыклары полигоннарын рекультивацияләү бу федераль проектка керми. Һәр полигонның хуҗасы бар һәм рекультивация буенча бурычлар эксплуатацияләүче оешмага беркетелгән.