Экология министрлыгы инспекторлары Азнакай гимназиясендә экодәрес үткәрделәр

2024 елның 26 марты, сишәмбе

Ык буе идарәсе хезмәткәрләре Бөтендөнья су ресурслары көненә дәрес багышладылар. Татарстанда 36 меңнән артык су объекты бар – бу елгалар, күлләр, сазлыклар, инешләр. Экология министрлыгы инспекторлары бу сулыкларны саклау һәм аларның чисталыгы турында кайгыртуның мөһимлеге турында сөйләделәр.

Беренче сыйныф укучылары үзләренең экологик яңалыклары белән уртаклаштылар – 1 сентябрьдән алар актив рәвештә батарейкалар, капкачлар һәм макулатура җыялар. Экодәрес истәлегенә балалар үзләренә махсус талисманнар - су тамчылары ясадылар. Алар үз тамчыларын төсле чәчәкләр белән бизәделәр һәм өйләренә алып киттеләр. Дәрес ахырында барысы да Министрлыктан «Экология мәктәбе» буяу-китапларын  бүләк итеп алдылар.