«Автомобильсез көн» акциясенә Татарстан Экология һәм табигый байлыклар министрлыгының барлык хезмәткәрләре кушылды

          Бүген Татарстанда “автомобильсез көн” акциясе. Рәсми рәвештә ул 22 сентябрьдә билгеләп үтелә, тик, Экология министрлыгы башлангычы белән ул тагын бер көнгә озайтылды, чөнки якшәмбедә автотранспорт агымы үзлегеннән түбәнәя.
Акцияне Татарстанның дәүләт хакимияте органнары, муниципалитетлар, предприятие һәм оешма җитәкчеләре дә хуплап кабул итте. Экология һәм табигый байлыклар министрлыгының барлык хезмәткәрләре бүген җәмәгать транспортыннан файдаланды. Хезмәткәрләр автомобильләре өчен булган стоянка бикле торды.
      Татарстан Экология һәм табигый байлыклар министры Артем Сидоровның әйтүенчә, хәзерге вакытта республикада һава бассейнының торышы җитди борчылу тудыра. “Бу борчылу һөнәри экологларда да, җәмәгатьчелектә дә, дәүләт хакимияте органнарында да бар, – дип белдерде министр. – Әйтергә кирәк, атмосфера һавасының стационар чыганаклардан (предприятиеләрдән) пычрануын без бер кимәлдә тота алабыз, шул ук вакытта, аның автомобильләр аркылы пычрануы үсә бара. Татарстанда бу проблеманы чишү өчен берничә программа тормышка ашырыла. Мисал өчен, автотранспорт чараларын табигый газга күчерү аларның төтен газлары белән чыга торган пычраткыч матдәләрне 2.5 тапкырдан күбрәк киметергә мөмкинлек бирә. Быел Министрлар Кабинеты карары белән “Татарстан Республикасында 2013-2023 елларда мотор газы ягулыгы базарын үстерү” программасы расланды, анда законнар базасына җитди үзгәрешләр кертү, тиешле инфраструктура төзү белән бәйле җитди чаралар комплексы күздә тотыла. Һәм ахыргы максат – җәмәгать транспортын да, шәхси автомобильләрне дә мотор газына күчерү.
           Автотранспорт чараларыннан атмосферага пычраткыч матдәләр чыгаруны киметү максатында Министрлык, МВДның Татарстан буенча юл хәрәкәте куркынычсызлыгы дәүләт инспекциясе идарәсе белән берлектә, май-октябрь айлары дәверендә ел саен “Саф һава” операциясе үткәрә. 2012 елдан башлап республиканың эре шәһәрләрендәге АЗСларда бензин парларын тоту һәм рекуперацияләү корылмалары урнаштыру буенча эш алып барыла. Хәзерге вакытта Казан, Түбән Кама, Әлмәт, Чаллы шәһәрләре җитәкчеләре, нефть продуктлары белән тәэмин итү субъектлары белән берлектә, 2013-2015 еллар эчендә андый корылмаларны шул шәһәрләрнең барлык АЗСларында да урнаштыруның план-графигын төзү һәм раслау буенча эш алып баралар.
           Татарстанның экологик хәлен яхшыртуда шәһәр һәм район территорияләрен яшелләндерү һәм төзекләндерү дә мөһим роль уйный. Моның өчен Казанда былтыр “Яшел рекорд” озайлы проекты эшли башлады, аның кысаларында 2012 елның көзендә 48 мең агач утыртылды. Быел 50 меңне утырту күздә тотыла.
            Безнең бүгенге акция турында әйткәндә, атмосфера һавасының сыйфатын бер көндә генә тамырдан үзгәртә алмыйбыз, билгеле. Төп максат – җәмәгатьчелекнең игътибарын җәлеп итү, кешеләрнең аңын бераз үзгәртү, проблемага башкачарак карау. Чынлыкта һаваның сыйфатын яхшыртуга аз гына булса да өлешне һәркайсыбыз кертә ала бит. Мисал өчен – бер автомобиль бер атна эчендә үзенең дүрт пассажирына ел буе суларга җитәрлек кислородны сарыф итә. Бу уйландыра торган нәрсә”, – диде Татарстан Экология һәм табигый байлыклар министры Артем Сидоров.
Министрлыкның матбугат хезмәте