Су ресурслары буенча федераль агентлыгы утырышында Александр Шадриков яңадан Куйбышев сусаклагычыннан агызу күләмнәрен киметергә тәкъдим итте
Бүген Су ресурслары буенча федераль агентлыкта Идел-Кама каскада сусаклагычларының эш режимнарын җайга салу буенча ведомствоара эш төркеменең чираттагы утырышы булды.
Утырышта эш төркеме әгъзалары, шул исәптән Росрыболовство, Росморречфлот, Россия Гадәттән тыш хәлләр министрлыгы, Россия Федерациясе Авыл хуҗалыгы министрлыгы, Россия Табигать министрлыгы, Росгидромет, «СО ЕЭС» АҖ, «РусГидро» ГАҖ, «Татэнерго» АҖ вәкилләре һәм Идел-Кама бассейны чикләрендә урнашкан субъектларның башкарма хакимият органнары вәкилләре, шул исәптән Чуаш Республикасы, Марий Эл Республикасы, Ульяновск, Самара, Волгоград, Әстерхан, Саратов өлкәләре вәкилләре катнашты.
Татарстан Республикасыннан видеоконференцэлемтә буенча утырышта Татарстан Республикасы экология министры Александр Шадриков, шулай ук «Татэнерго» АҖ вәкиле катнашты.
11.10.2023 – 10.11.2023 чорында Идел-Кама каскадында сусаклагычларның эш режимнарын билгеләү мәсьәләсе буенча фикер алышынды.
5 октябрьгә Куйбышев сусаклагычы дәрәҗәсе 50,18 м БС тәшкил итә.
Росгидромет мәгълүматларына караганда, сентябрьдә Идел-Кама каскады сусаклагычында су агымы норманың 65% тәшкил иткән. Октябрьгә фараз – норманың 62%. Октябрьдә иң түбән агым Кама сусаклагычында фаразлана, мондый аз сулык биредә 33 елга 1 тапкыр гына теркәлә.
2023 елның түбән сулыгын исәпкә алып, экология министры Александр Шадриков 5 төбәктән (Татарстан Республикасы, Марий Эл Республикасы, Чуаш Республикасы, Ульяновск, Самара өлкәләре) Куйбышев сусаклагычы чыгымнарын 3400 куб. м/с кадәр киметү тәкъдиме белән чыкты.
Әмма, Росморречфлотны да кертеп, күпчелек тавыш белән Түбән Идел регионнары (Әстерхан өлкәсе) суына ихтыяҗыннан чыгып, режимнар кабул ителде, аның нигезендә Жигулев гидроузелы аша чыгымнар 10.11.2023 кадәр 4400 куб.м/с. күләмдә саклана. Шул ук вакытта Куйбышев сусаклагычындагы гидроузелның эш режимнары Куйбышев сусаклагычындагы су ресурсларыннан файдалану кагыйдәләренә туры килми. «Идел елгасында Куйбышев сусаклагычының су ресурсларыннан файдалануның төп кагыйдәләре»ндә билгеләнгән Куйбышев сусаклагычы эшенең диспетчерлык графигы нигезендә, сусаклагыч түбән гарантияләнгән навигацион попуск зонасында (3400 куб.м/с) урнашкан. Шуңа күрә Татарстан тәкъдимнәре гамәлдәге Кагыйдәләрдә билгеләнгән режимнарны үтәүгә юнәлтелде.
Фаразланган исәпләүләр буенча 4400 куб. м/с күләмендә чыгым булган очракта, Куйбышев сусаклагычы дәрәҗәсе 11 ноябрьгә 49,80 м БС тамгасына яисә 38 см түбәнәячәк.
Сусаклагычларның гидроузеллары эшенең билгеләнгән режимнары Росводресурсының рәсми сайтында бастырылачак.