5 ел эчендә Иделдә теркәлгән пычраткыч матдәләр саны 27,4 процентка кимегән
Бүген Татарстан Республикасы Сәүдә-сәнәгать палатасында «Идел буе туристлык объектларын экологик бәяләү һәм мониторинглау: актуаль ысуллар һәм бурычлар» дигән темага түгәрәк өстәл узды. Чараны «Без рек как без рук» коммерцияле булмаган экологик фонды үткәрде. Анда Татарстан Республикасы Экология һәм табигать ресурслары министрлыгының әйләнә-тирәлекне саклау икътисады һәм проектларны планлаштыру бүлеге башлыгы Галина Бочкова һәм Татарстан Республикасы Экология министрлыгының экологик мониторинг бүлеге башлыгы Елена Закирова катнашты.
«2018 елдан башлап Иделдә теркәлгән пычраткыч матдәләр 27,4% кимегән. Бу «Экология» илкүләм проектының «Иделне савыктыру» федераль проекты кысаларында табигатьне саклау чараларын үтәү нәтиҗәсендә мөмкин булган. Бу Васильево штп., Түбән Карама ш.т.п. биологик чистарту корылмаларын төзү, Казан шәһәрендә «Водоканал» МУП чистарту корылмаларын реконструкцияләү һәм башка чаралар», – дип сөйләде Экология министрлыгының экологик мониторинг бүлеге җитәкчесе Елена Закирова үзенең чыгышында.
Ул билгеләп үткәнчә, 2014 елдан 2022 елга кадәр 336 проба алынган. Иделнең җир өсте суларын мониторинглау нәтиҗәләре буенча марганец һәм тимер буенча аеруча куәтле пычраклар булуы теркәлгән. Шулай ук бакыр, фосфат ион, нитрит, БПК5, аммоний ионы һәм цинк буенча артулар да ачыкланган. Иделнең җир өсте суларының гидрохимик торышын даими күзәтүләр 5 күзәтү пунктында бара. Моннан тыш, мониторинг «Фламинго» фәнни-тикшеренү корабы ярдәмендә реаль вакыт режимында башкарыла.
Түгәрәк өстәл утырышында доклад белән шулай ук ТР Экология министрлыгының Әйләнә-тирәлекне саклау һәм проектларны планлаштыру икътисады бүлеге җитәкчесе Галина Бочкова чыгыш ясады. Ул «Иделне савыктыру» проектына җентекләп тукталды. Республика буенча 2024 елга кадәр бу юнәлеш буенча финанслауның гомуми күләме 22,3 млрд сум тәшкил итә, шул исәптән 15,5 млрд – федераль бюджеттан.
«Безнең республика территориясендә 13 чистарту корылмасын төзү һәм реконструкцияләү һәм Идел елгасына куркыныч тудыручы әйләнә-тирә мохиткә тупланган 2 объектны бетерү планлаштырыла», – дип билгеләп үтте ТР Экология министрлыгының Әйләнә-тирә мохитне саклау һәм проектларны планлаштыру икътисады бүлеге башлыгы Галина Бочкова.
Моннан тыш, «Уникаль су объектларын саклау» федераль проекты кысаларында ел саен халык катнашында су объектлары ярларын чистарту буенча экологик проектлар гамәлгә ашырыла. Исегезгә төшерәбез, Татарстан Республикасы 2021 һәм 2022 елларда волонтерлар тарафыннан су объектларының яр буе территорияләрен чистарту буенча «Россия суы» бөтенроссия акциясе лидеры булды.