«Экотуризмны үстерү идеясе һәм практикасы яңа концептуаль һәм юридик нигез алды, шул исәптән тыюлыклар һәм милли парклар базасында»

      Бу турыда Россия Федерациясе Табигый байлыклар һәм экология министры Сергей Донской Россия тыюлыклары һәм милли парклары җитәкчеләренең федераль әһәмияттәге аеруча саклаулы табигый территорияләрдә таныштыру туризмын үстерү мәсьәләләренә багышланган Бөтенроссия киңәшмәсендә белдерде.
        Табигать министрлыгы башлыгының әйтүенчә, тыюлыклардагы туризм яхшылап регламентланган булырга һәм аеруча саклаулы һәр табигый территориянең үзенчәлекләрен һәм күләмен исәпкә алырга тиеш. Саклаулы һәр табигый территориядә туризмны үстерү буенча эш биологик һәм ландшафт төрлелеген саклау бурычларын үтәү, ягъни бу территориянең төп мәгънәсе белән яраштырып эшләнергә тиеш. Йөз еллык дөнья тәҗрибәсе мондый мөнәсәбәтнең реальлеген ачык күрсәтеп тора.
       Үз чыгышы кысаларында Табигать министрлыгы башлыгы киңәшмәдә катнашучыларга Россия Хөкүмәтенең 2011 елның 22 декабрендә раслаган стратегик мөһим документы – Федераль әһәмияттәге аеруча саклаулы табигый территорияләр системасын 2020 елга кадәрге чорда үстерү концепциясе турында да искәртте.
“Шуны да әйтергә кирәк, федераль табигый территорияләр челтәре соңгы 20 елда 80%тан күбрәккә артты. 2020 елга кадәр тагын 11 яңа тыюлык, 16 милли парк, 1 федераль заказник булдыру, шулай ук әлегәчә булган 12 аеруча саклаулы табигый территорияне киңәйтү планга кертелгән” – дип белдерде Сергей Донской.
        Россия Табигый байлыклар һәм экология министры федераль әһәмияттәге табигый территорияләрне финанслауның база күләмен үстерү мәсьәләсендә соңгы 3 елда күзәтелгән уңай үзгәрешләрне дә билгеләп үтте: “Бер генә мисал: быел без урман төзекләндерү эшләрен берьюлы 42 тыюлыкта һәм милли паркта финанслыйбыз, – моның совет чорыннан соңгы бөтен тарихта булганы юк иде”.
       Аеруча саклаулы табигый территорияләрне янгын куркынычы зур булган сезонга әзерләү һәм тәэмин итү буенча уңай үзгәрешләр дә ассызыкланды: “Тыюлыкларда һәм милли паркларда урманнарны янгыннан саклау буенча әзерлек тамырдан үзгәрде. Федераль территория чикләрен ызанлау, җир кишәрлекләрен кадастр исәбенә алу һәм җир биләү хокукларын теркәү кебек көнүзәк мәсьәләләрдә хәл сыйфат ягыннан үзгәрде”, – дип белдерде Сергей Донской.
         Россия Табигать министрлыгы башлыгы белем бирү һәм мәдәни агарту бурычларын чишү кысаларында алып барылган зур эшләрне, шул исәптән белгечләрнең классификациясен күтәрүне, Россия милли парклары һәм тыюлыклары хезмәткәрләренең тәҗрибә алмашуын аерым рәвештә күрсәтеп узды.
           Бөтенроссия киңәшмәсе 2013 елның 28 – 30 августында Хакасиянең Саяногорск шәһәрендә уза.
Чарада Россия Табигать министрлыгы һәм Хакасия Республикасы Хөкүмәте вәкилләре, аеруча саклаулы территорияләр җитәкчеләре, эксперт-күзәтчеләр, экологик җәмәгать оешмалары вәкилләре катнаша.
Россия Федерациясе Табигый байлыклар һәм экология министрлыгы сайтыннан.

ТР Экология һәм табигый байлыклар министрлыгының матбугат хезмәте