Чүпрәле районында «Экология һәм без» дигән IV фәнни-гамәли конференция узды
Чүпрәле районының В.С. Дементьев исемендәге Алешкин-Саплык мәктәбендә «Экология һәм без» дигән IV фәнни-гамәли конференция узды. Чарада Татарстан Республикасы Экология һәм табигать ресурслары министрлыгының мәгълүмат системалары һәм экологик агарту идарәсе башлыгы Дамир Вәлиуллин катнашты.
Анда Татарстанның төрле районнарыннан һәм шәһәрләреннән 1-11 сыйныф укучылары чакырылды. Яшь тикшерүчеләр 5 секциядә 41 проект тәкъдим иттеләр:
- Хайваннар экологиясе
- Кеше экологиясе һәм аның сәламәтлеге
- Әйләнә-тирә мохит һәм туган як экологиясе
- Минем йорт экологиясе
- Минем беренче проектым
«Фәнни-гамәли конференцияләр укучыларга ораторлык сыйфатларын яхшырту һәм үз хезмәтләрен компетентлы жюрига тәкъдим итү өчен бик яхшы мөмкинлек бирә. Бүген балалар югары әзерлек дәрәҗәсен күрсәттеләр, мәктәп укучыларының проектлары бүгенге дөньяда актуаль», - дип үз фикерләре белән уртаклашты Дамир Вәлиуллин.
Конференциядә җиңүчеләр һәм призерлар истәлекле дипломнар һәм призлар белән бүләкләнделәр.