«Яз канатларында!» Нурлатта сыерчык оялары фестивале узды
«Экояз-2022» республика акциясе кысаларында Нурлат районында беренче тапкыр «Яз канатларында» дип аталган сыерчык оялары фестивале узды. Акцияне «Буратино» балалар бакчасы коллективы, ТР Экология һәм табигать ресурслары министрлыгының Көньяк-Көнчыгыш территориаль идарәсе белгечләре, «Бердәм Россия» партиясенең төбәк бүлекчәсе вәкилләре һәм урманчылык хезмәткәрләре башлап җибәрде.
Бәйге 4 номинация буенча уздырылды: «Стандарт сыерчык оясы», «Оригиналь сыерчык оясы», «Сувенир җимлек» һәм «Экологик сыерчык оясы».
Жюри хөкеменә 200ләп эш тәкъдим ителде. Балалар эшне иҗади якын килеп башкарды: сыерчык ояларының төрле формада булуы, төрлечә эшләнүе, шулай ук стандарт булмаган материалларның кулланылуы шул турыда сөйли. Фестиваль мәйданчыгында мастер-класслар да узды, анда теләгән һәркем оригами техникасы буенча кәгазьдән кош яки җимлек ясап карый алды.
Фестиваль истәлеге итеп экологлар балаларга грамоталар һәм экологик тематикага караган китаплар тапшырды.