Экологлар Кама Тамагы шәһәр тибындагы бистәдә санкцияләнмәгән чүплек гаеплеләрен эзли
Министрлыкның Кама буе территориаль идарәсе инспекторлары Кама Тамагы шәһәр тибындагы бистәдә биналарны сүтүдән, төзелеш кирпеч ватыкларыннан һәм тимер-бетон эшләнмәләрдән чүп-чар калдыкларын ачыклаган. «Чүп-чар каты коммуналь калдыклар полигонының санитар-яклау зонасы территориясеннән тыш бушатылды», – ди экологлар. Пычранган кишәрлекнең мәйданы – 230 кв.м., күләме – 50 куб.м.
Идарә хезмәткәрләре тарафыннан тикшерү акты төзелгән. Калдыкларның милекчесен билгеләү өчен административ тикшерү кузгатылган. Гаепле затлар Административ хокук бозулар турында РФ кодексының 8.2 ст. 1 өлеше («Җитештерү һәм куллану калдыкларын җыю, туплау, ташу, эшкәртү, утильләштерү һәм зарарсызландыру вакытында әйләнә-тирә мохитне саклау өлкәсендә таләпләрне үтәмәү») нигезендә җаваплылыкка тартылачак.