Без чисталык һәм тәртип яклы! Арча районында экологик чара үткәрелгән
Министрлыкның Төньяк территориаль идарәсе белгечләре, «Ашыт» дәүләт табигать комплекслы заказнигы хезмәткәрләре белән берлектә, Арча районы Яңа Кырлай урта мәктәбе укучылары өчен экологик десант үткәргән. Габдулла Тукай дәүләт әдәби-мемориаль музей комплексы территориясендә һәм мәктәп яны участогында балалар өмә үткәргән. Барлыгы 8 капчык чүп-чар җыелган. Чара кысаларында белгечләр балалар белән җәйге каникуллар вакытында табигатьтә үз-үзеңне тоту кагыйдәләре турында әңгәмә үткәргән. Шулай ук мәктәпнең Халыкара балаларны яклау көненә багышланган «Туган як табигате турында балалар – туган телдә» дип исемләнгән нәфис сүз осталары конкурсына йомгак ясалган. Җиңүчеләргә дипломнар, барлык катнашучыларга – ТР Экология һәм табигать ресурслары министрлыгыннан китаплар тапшырылган.