Рөстәм Миңнеханов: Калдыклар белән нәтиҗәле эш итүне тәэмин итәрлек тулы кыйммәтле көйләү системасы, сәүдә һәм администрация инструментлары җыелмасы булдырырга кирәк

2013 елның 29 апреле, дүшәмбе
Экологик проблемаларны чишүгә Татарстан Хөкүмәте эшендә зур өстенлек бирелә. Бу турыда бүген республикада калдыклар белән эш итүнең бердәм комплекслы системасын оештыру мәсьәләләренә багышланган киңәйтелгән киңәшмәдә Татарстан Республикасы Президенты Рөстәм Миңнеханов белдерде. Барлык муниципаль районнар белән видеоконференция режимындагы бу киңәшмә Татарстан Хөкүмәте йортында узды. Аны Табигатьтән файдалану өлкәсендә күзәтчелек федераль хезмәте җитәкчесе Владимир Кириллов алып барды. Киңәшмә эшендә Татарстан экология һәм табигый байлыклар министры Артем Сидоров та катнашты.
Атап әйткәндә, Владимир Кириллов Рөстәм Миңнехановка Татарстан Республикасына чакырганы өчен рәхмәт белдерде. “Бу киңәшмә беренче буларак Татарстанда уздырыла, арытаба Россиядә калдыклар белән эш итүнең комплекслы системасы буенча мондый киңәшмәләр федераль округларда үткәреләчәк”, – диде. Рөстәм Миңнеханов, үз чиратында, 2013 елның Россиядә Әйләнә-тирәлекне саклау елы дип, ә Татарстанда Экологик культура елы дип тә игълан ителүен искәрде.
“Экологик проблемаларны чишүгә безнең Хөкүмәтнең эшендә зур өстенлек бирелә, – диде Рөстәм Миңнеханов. – Калдыклар җыелу проблемасы бүген бигрәк тә көн үзәгендә, – бөтен ил буенча да, регионнарда да, республикабызда да. Ел саен 8-9 млн тонна калдык барлыкка килә, шуның 1 млн тоннасы – көнкүреш калдыклары, 1 млн тоннасы – индустрия калдыклары, 6 млн тоннасы – терлекчелек калдыклары. Дөресен әйтергә кирәк, без бервакытны бу проблема белән шактый шөгыльләндек, 10-15 ел элек 50 каты көнкүреш калдыклары полигоны, 662 санкцияле чүплек төзелде һәм эшләп тора. Үкенечкә каршы, бу объектларның тулу темплары бик югары.”
Рөстәм Миңнехановның әйтүенчә, калдыклар белән эш итүнең Татарстанда булган хәзерге системасы күбесенчә аларны полигоннарда күмүгә нигезләнә. “Хәлне үзгәртергә кирәк, – диде ул, – калдыклар белән нәтиҗәле эш итүне тәэмин итәрлек тулы кыйммәтле көйләү системасы, сәүдә һәм администрация инструментлары җыелмасы булдырырга кирәк. Калдыклар белән эш итүнең бердәм комплекслы системасын төзергә кирәк.”
Рөстәм Миңнеханов: “Татарстанда пилот проекты әзерләнде, проект кысаларындагы төп программ чаралар калдыклар белән эш итү буенча махсус үзәк төзүне күздә тота, аңа полигон, сортлау станцияләре, калдыкларны эшкәртү производствосы үзе һәм экотехнопарк керәчәк”, – дип белдерде. – “Бу бик кызыклы проект, һәм без сездән дә бәя алырга теләр идек, – диде ул, Владимир Кирилловка мөрәҗәгать итеп. – Аннан тыш, Татарстанда җитештерү һәм куллану калдыклары белән эш итүнең республика программасы да әзерләнгән, һәм якын араларда без аны кабул итәргә тиешбез.”
Татарстан Президентының әйтүенчә, бүген калдыклар белән эш итү буенча “Электрон экология” бердәм мәгълүмат системасын булдырырга кирәк. Бу сегмент шулай ук бик мөһим, чөнки калдыкларның хәрәкәтен максималь үтә күренмәле итәчәк.
Рөстәм Миңнеханов калдыклар белән эш итү культурасын күтәрүнең, аларны җыю һәм эшкәртүнең яңа системасына аерым тукталды.
Татарстанда бүген нефть чыгару һәм эшкәртү, нефть химиясе, машина төзү кебек югары үскән тармаклар бар, һәм аңлашыла ки, – алар экологиягә авырлык китерәләр, дип белдерде Рөстәм Миңнеханов. Аның сүзләренчә, республиканың нормаль экологик торышын системалы эшләү һәм дөрес юллар табу гына тәэмин итәчәк. Ул Табигатьтән файдалану өлкәсендә күзәтчелек буенча федераль хезмәт җитәкчелеген “Татарстан барлык экологик проектларда да актив катнашачак”, дип ышандырды.
Татарстан Республикасы Президентының матбугат хезмәте мәгълүматы
Фоторепортаж
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Министрлык турында
Документлар
Матбугат хезмәте
Гражданнар мөрәҗәгатьләре өчен
Адрес: 420049, Казан шәһәре, Павлюхин урамы, 75
Телефон: +7 (843) 267-68-01, 267-68-02
Факс: +7 (843) 267-68-70
E-Mail: eco@tatar.ru
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International