Татарстан Республикасы Экология һәм табигать ресурслары министрлыгы

«Җир сәгате – 2013» халыкара акциясе

2013 елның 19 марты, сишәмбе

2013 елның 23 мартында, шимбә көнне, җирле вакыт белән 20:30 сәгатьтә Бөтендөнья кыргый табигать фондының (WWF) “Җир сәгате” дигән еллык глобаль акциясе үткәрелә. Бу – кешелек тарихында иң күләмле акция. Ел саен мартның соңгы шимбәсендә бөтен дөньяда миллионнарча кеше бер сәгатькә электр утын сүндерә, чөнки аларга Җир планетасының киләчәге мөһим. Җир сәгате – табигатькә сак караш, планетабызның чикләнгән ресурслары турында кайгырту, климатны саклау буенча кискен чараларга чакыру символы ул.

“Җир сәгате” халыкара акциясен үткәрергә 2007 елның мартында, WWF башлангычы белән, Австралиянең Сидней шәһәре чакырып чыкты. Ул чакта аңа дөньяның 35 илендәге 270 шәһәрдән 50 миллионнан артык кеше катнашты. 2009 елда катнашучы илләр саны 88гә җитте, шәһәрләр саны 1.4 меңнән артып китте. Шул ук елда акциягә рәсми рәвештә Россия дә кушылды.

Былтыр “Җир сәгате” моңарчы булган акцияләрне узып рекорд куйды. Аңа дөнья буенча 1.5 миллиард чамасы кеше катнашты. “Җир сәгате-2012”гә 150 ил һәм 6525 шәһәр кушылды, шуларның 40ы – Россия шәһәрләре. Татарстан Республикасында “Җир сәгате-2012” акциясендә 120дән артык предприятие һәм оешма, шулай ук барлык шәһәр һәм торак пунктларда яшәүчеләр кушылды. Иң активлары Чаллы, Әлмәт, Бөгелмә һәм Түбән Кама булды.

Республиканың башкаласында электр уты Мэриядә һәм Казан Ратушасында, министрлык һәм ведомство биналарында сүндерелде. Акциягә шулай ук республиканың күпчелек шәһәрләрендәге мәктәпләр, мәдәният сарайлары, спорт комплекслары кушылды. “Казан” Милли мәдәният үзәге өстендә күккә 500 һава фонаре җибәрелде. Акция төрле-төрле яшьтәге, социаль статустагы кешеләрне планетада таза климатны саклау максатында берләштерде.

Быел “Җир сәгате-2013” “Синең йөреш – минем йөреш. Планетаны коткару өчен дөньяны көрәшкә чакыр!” дигән оран астында үтәчәк. “Синең йөреш – минем йөреш” концепциясе – ике якның берсе планетага анык ярдәм күрсәтергә ризалашса, икенче як та кызыклы һәм файдалы берәр нәрсә эшләргә вәгъдә итә, дигән иҗтимагый килешү ул. Бу аларны уңай экологик нәтиҗәгә ирешү максатында берләштерә.

Татарстан Экология һәм табигый байлыклар министрлыгы планетабызның язмышына һәм иминлегенә битараф булмаган барлык кешеләрне “Җир сәгате” акциясенә кушылырга, энергия ресурсларын һәм әйләнә-тирәлекне саклауга үзеннән өлеш кертергә чакыра.

БАРЛЫК ЯҢАЛЫКЛАРНЫ УКУ