Татарстан Республикасы Экология һәм табигать ресурслары министрлыгы

2012 елгы эш йомгаклары буенча коллегия утырышы

2013 елның 12 феврале, сишәмбе

Бүген Татарстан Министрлар Кабинетында Татарстан Экология һәм табигый байлыклар министрлыгы коллегиясенең “Татарстан Республикасы Экология һәм табигый байлыклар министрлыгының 2012 елгы эш йомгаклары һәм 2013 елга бурычлары турында” дип аталган утырышы булып узды.

Коллегиядә Россия Федерациясенең табигый байлыклар һәм экология министры Сергей Донской, Татарстан Республикасы Президенты Рөстәм Миңлеханов, Су ресурслары федераль агентлыгы җитәкчесе Марина Селиверстова, Идел регионара табигать саклау прокуратурасы прокуроры Вера Солдатова, Россия Федерациясе Президентының Идел буе федераль округындагы вәкаләтле вәкиле урынбасары Алексей Сухов, Идел буе федераль округы субъектлары министрлыкларының һәм ведомстволарының җитәкчеләре катнашты.

Төп доклад белән Татарстан экология һәм табигый байлыклар министры Артем Сидоров чыгыш ясады, ул анда Министрлыкның 2012 елгы эшенә йомгак ясады һәм 2013 елга бурычлары турында сөйләде. Министрлык алдында торган өстенлекле бурычлар арасыннан түбәндәгеләр билгеләп үтелде:

– атмосфера һавасына техноген йөкләнешне киметү;

– су ресурсларын саклау һәм рациональ файдалану;

– калдыклар белән эш итү системасының нәтиҗәлелеген күтәрү;

– Бөтендөнья җәйге Универсиадасын әзерләү чорында экологик куркынычсызлыкны тәэмин итү;

– халыкның экологик культура кимәлен күтәрү, җәмәгать оешмаларын һәм яшьләрне экологик проблемаларны чишүгә актив җәлеп итү;

– әйләнә-тирәлекне саклау өлкәсендә инвестиция эшчәнлегенең нәтиҗәлелеген күтәрү.

Министрның тулы доклады http://eco.tatarstan.ru сайтында “Матбугат хезмәте – Министрның рәсми чыгышы” бүлегендә урнаштырылган.

Казан мэры Илсур Метшин 2013 елда, алда торган Универсиадага бәйле рәвештә, беренче планга Татарстан Республикасын төзекләндерү һәм яшелләндерү чыга, дип билгеләп үтте. Аның фикеренчә, башкаланың “үпкәләрен” ныгытырга кирәк. Шәһәрне яшелләндерүнең ачык мисалы булып былтыр көз башланган “Яшел рекорд” проекты тора, аның барышында 1224 мәйданчык, 829 ишегалды яшелләндерелгән. Проект быел да дәвам итәчәк. Шулай ук, федераль үзәк ярдәме белән, инде Казанның яр буйлары ныгытыла.

Коллегиягә чакырылган кунаклар – Шәһәр экологиясе фәнни тикшеренү һәм проектлау-эзләнү институты җитәкчесе Анна Курбатова, Киров өлкәсе Экология һәм табигатьтән файдалану департаменты башлыгы Алла Албегова, Удмуртия Республикасы табигый байлыклар һәм әйләнә-тирәлекне саклау министры вазифаларын башкаручы Александр Нестеров, Россия Федерациясе Президентының Идел буе федераль округындагы вәкаләтле вәкиле урынбасары Сухов Алексей Петрович, Идер регионара табигать саклау прокуратурасы прокуроры Вера Солдатова да доклад белән чыгыш ясадылар.

Су ресурслары федераль агентлыгы җитәкчесе Марина Селиверстова үз чыгышында Татарстан җитәкчелегенең әйләнә-тирәлекне саклау өлкәсендәге эшчәнлегенә югары бәя бирде. Шулай ук сусаклагычлардан һәм су ресурсларыннан файдалану мәсьәләләрендә җаваплы позициясе өчен республика хөкүмәтенә, су мөнәсәбәтләре өлкәсендә Россия Федерациясенең аерым вәкаләтләрен тормышка ашыру эшләрен югары кимәлдә оештырганы өчен Татарстан Экология һәм табигый байлыклар министрлыгына рәхмәтләр белдерде.

Марина Селиверстова шулай ук, су объектларын саклау эше гади чистартуга караганда системалырак эш итүне таләп итә, дип белдерде. Экологик эшләргә, аның фикеренчә, җәмгыятьнең иң киң даирәләрен – олысын-кечесен җәлеп итәргә кирәк.

Россия Федерациясе табигый байлыклар һәм экология министры Сергей Донской үз чыгышында, нәтиҗәле хезмәттәшлек анда хакимиятнең барлык органнары катнашканда гына мөмкин, дип белдерде. Шулай ук Рөстәм Миңлехановка зур күләмле табигать саклау проектларын нәтиҗәле тормышка ашырганы өчен рәхмәт белдерде. Арытаба Сергей Донской: Татарстан экология өлкәсендә тагы да югарырак нәтиҗәләргә ирешер, чөнки эш темплары шуңа мөмкинлек бирә. Быел Россиядә “Җәмәгать контроле” проектын тормышка ашыру планлаштырыла, һәм аның нигезенә Татарстанда уңышлы эшләп килгән охшаш проект салыначак, – дигән фикер әйтте.

Сергей Донскойның сүзләренчә, Әйләнә-тирәлекне саклау елында теләгән нәтиҗәләргә ирешү өчен хакимиятнең һәм җәмгыятьнең барлык көчләрен консолидацияләү сорала. Татарстанда экологик проектларны тормышка ашыруга яхшы стимул булып Универсиада үткәрү тора. Универсиада кысаларында планлаштырылган проектлар җиренә җиткереләчәк. Бу аларны республиканың бүтән шәһәрләрендә дә активлаштырырга мөмкинлек бирәчәк.

Татарстан Президенты Рөстәм Миңлеханов киңәйтелгән коллегия әгъзаларына утырышта катнашулары өчен рәхмәт белдерде һәм Татарстан Экология һәм табигый байлыклар министрлыгының җәмәгать оешмалары белән эшләвен аерым билгеләп үтте. Шулай ук транспортка газ-мотор ягулыгы иңдерү перспективаларына игътибар юнәлтте, бер үк вакытта экологик булмаган транспорт куллануны чикләргә чакырды. Татарстан Экология һәм табигый байлыклар министрлыгына йөкләмәләр арасында Президент перспективалы төзелеш участокларын алдан-ала геологик өйрәнүне, яңа төзелешләр планлаштырганда республиканың Төзелеш министрлыгы белән хезмәттәшлек итүне, шулай ук экологик бозышларны профилактикалауны атады. Рөстәм Миңлехановның сүзләренчә, һәр төзелеш “яшел стандарт”ка туры килергә тиеш.

Коллегиядән соң журналистларга интервью биргәндә Татарстан Президенты: әйләнә-тирәлеккә кешеләр дә керә. Кешенең табигатькә мөнәсәбәте күп яктан аның тәрбиясенә һәм гаилә мөнәсәбәтләренә бәйле. Шуңа күрә балаларны экология дөньясына яшьли җәлеп итә башлау мөһим, – дип белдерде. Сергей Донской да, Президентны җөпләп: ”Ата-аналар гына балада табигатькә сак мөнәсәбәт тәрбияли ала”, – диде.

Йомгаклау коллегиясе соңында Президент Рөстәм Миңлеханов һәм Россия Федерациясе табигый байлыклар һәм экология министры Сергей Донской Татарстан Экология һәм табигый байлыклар министрлыгының иң яхшы белгечләренә бүләкләр тапшырдылар.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ