Тимер юл яны территорияләренең санитар-экологик торышы

Татарстан экология һәм табигый байлыклар министрлыгы “Казан – Яшел Үзән – Казан – Казан Халыкара Аэропорты” маршруты буенча тимер юлга бирелгән полосаның һәм янәшә территорияләрнең санитар-экологик торышын тикшерү буенча сәфәр оештырды, анда министрның беренче урынбасары, Табигатьне саклау буенча Татарстанның баш инспекторы Рөстәм Камалов катнашты.

Сәфәрдә шулай ук Татарстан экология һәм табигый байлыклар министрлыгының Үзәк территориаль идарәсенең, Россия табигать күзәтчелеге идарәсенең, Казан ш. Совет һәм Идел буе районнары башкарма комитетларының, Яшел Үзән һәм Лаеш районнары башкарма комитетларының вәкилләре, шулай ук Горький тимер юлының Казан бүлекчәсе (ГЖД) башлыгы урынбасары катнашты.

Сәфәр журналистларга һәм кызыксынучы службаларга Горький тимер юлының Казан участогындагы тимер юл тирәләренең экологик торышы белән танышу һәм пычрану дәрәҗәсен бәяләү мөмкинлеге бирде.

Сәфәр Горький тимер юлының бу кисемтәсенең һәм аңа янәшә территорияләрнең ярыйсы хәлдә булуын күрсәтте. Мәгәр, бакчачылык ширкәтләрендә һәм Казан яны шәхси торак секторында җитешсезлекләр дә күзәтелде. Алар контейнер мәйданчыкларына, бакчачылык ширкәтләре һәм шәхси торак секторы коймаларына кагылалар.