Татарстан Республикасы Экология һәм табигать ресурслары министрлыгы

Зөя утрау-каласына ЮНЕСКОның Бөтендөнья мәдәни һәм табигый мирас объекты статусы биреләчәк

2012 елның 22 октябре, дүшәмбе

Узган атнада, 15–19 октябрьдә, Татарстанда Халыкара табигатьне саклау берлегенең иң алдынгы экспертларыннан берсе, Эстония Социаль фәннәр университеты профессоры, “Экология һәм табигатьтән файдалану” факультеты деканы Калев Сепп булып китте.

Сепп әфәнденең безгә килүенең максаты – Зөя тарих-архитектура һәм табигать-ландшафт комплексының аңа ЮНЕСКОның бөтендөнья мәдәни һәм табигый мирас объекты дигән югары статус бирү өчен кирәкле таләпләргә һәм критерийларга ярашлылыгын экспертизалау иде.

Халыкара экспертның нәтиҗәле эшләвен тәэмин итү өчен Татарстан Республикасы Президенты ярдәмчесе, “Татарстан Республикасының тарихи һәм мәдәни истәлекләрен яңадан торгызу фонды” коммерциясез оешмасының башкарма директоры Татьяна Петровна Ларионова җитәкчелегендә оператив эш төркеме төзелде. Эш төркемендә шулай ук Татарстан Республикасы Министрлар Кабинеты Аппаратының бүлек җитәкчеләре, Идел-Кама дәүләти табигый биосфера тыюлыгы директоры, Мәдәният министрлыгы, Экология һәм табигый байлыклар министрлыгы, Урман хуҗалыгы министрлыгы, Яшьләр эшләре, спорт һәм туризм министрлыгы, Татарстан Республикасы Фәннәр Академиясенең Экология һәм җир асты байлыкларыннан файдалану проблемалары институты, башка күп кенә республика тармаклары җитәкчеләренең урынбасарлары актив катнашты.

16 октябрь көнне Татарстан Республикасы Президенты Аппаратында “түгәрәк өстәл” оештырылды, анда республика министрлыкларының һәм тармакларының белгечләре халыкара экспертның барлык сорауларына җентекле җаваплар бирделәр, ул сораган һәм Зөя утрау-каласының, Куйбышев сусаклагычындагы Зөя култыгы табигый комплексларының гаять зур эстетик һәм табигый кыйммәтен раслый торган барлык материалларны тапшырдылар.

Ә 17 һәм 18 октябрь көннәрендә Калев Сеппуга искиткеч матур һәм тәэсирле, күренекле ландшафт феномены – Зөя утрау-каласы һәм янәшәдәге Зөя тамагы тугайлары белән җентекләп танышу мөмкинлеге бирелде.

Зөя шәһәре ансамбле, тиңдәшсез матур, киң һәм күптөрле табигый ландшафтлар, күпсанлы тугай утрауларындагы хозур әрәмәләр халыкара экспертка көчле тәэсир ясады, нәтиҗәдә ул, Татарстан Президенты Рөстәм Нургали улы Миңлеханов белән очрашкач, Зөя утрау-каласына Бөтендөнья мәдәни һәм табигый мирасы объекты статусы бирү һәм Татарстанда табигый ландшафтны саклау буенча халыкара конференция үткәрү идеяләрен берсүзсез хуплавы турында белдерде.

Татарстанның күпчелек халкы ЮНЕСКО тарафыннан Зөя утрау-каласын Халыкара мәдәни һәм табигый мирас объектлары йолдызлыгына кабул итү турында гадел хөкем чыгарылачак данлыклы көнне түземсезлек белән көтәр дип ышанабыз.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ