Подряд оешмасы Әлмәттә калкып чыккан рөхсәтсез чүплек өчен штраф түлиячәк
Быелның август аенда территорияләрне вертолетка утырып тикшерү барышында Әлмәт шәһәре читендә рөхсәт ителмәгән урында төзелеш калдыкларыннан чүплек калкып чыгуы ачыкланган. Татарстан Республикасы Экология һәм табигать ресурслары министрлыгының Көньяк-Көнчыгыш территориаль идарәсе инспекторлары кичекмәстән шул урынга юл тоткан. Территорияне тикшерү барышында ике чүп-чар өеме табылган. Чүплекнең гомуми мәйданының 24,38 кв.м тәшкил итүе исәпләп чыгарылган. Чүп-чар арасыннан “Транснефть-Прикамье” акционерлык җәмгыятенең “Кәләй” нефть кудыру станциясе объекты документлары табылган. Тикшерү барышында ачыкланганча, участокка капиталь төзекләндерүдән калган чүп-чар өеп куелган. Калдыкларны объектта эшләр башкарган подряд оешмасы – “ГИРС” җаваплылыгы чикләнгән җәмгыятенең ташлап калдыруы билгеләнгән.
Әлеге факт буенча юридик затка Административ хокук бозулар турында Россия Федерациясе кодексының 8.2 статьясындагы 3 өлеше (“Бу статьяның 1 өлешендә күздә тотылган, кешеләрнең сәламәтлегенә яки әйләнә-тирә мохиткә зыян салуга яки эпидемиягә яисә эпизоотиягә китергән гамәлләр (гамәл кылмау) – бу гамәлләр (гамәл кылмау) җинаятьчел гамәл булмаганда”), Административ хокук бозулар турында Россия Федерациясе кодексының 8.7 статьясындагы 2 өлеше (“Җирләрне яхшырту, саклау һәм туфракны җилдән, судан ашалудан саклау һәм башка процессларны, җирләрнең сыйфатын начарайтуга китерердәй әйләнә-тирә мохиткә бүтән тискәре йогынтыны булдырмый калу буенча билгеләнгән таләпләрне һәм мәҗбүри чараларны үтәмәү”) буенча административ хокук бозу турында беркетмәләр төзелгән. Закон бозучыга 800 мең сум күләмендә штраф яный.