Арча 3нче башлангыч мәктәбенең беренче сыйныф укучылары яшь экологлар сафларына кушылды
Балаларга “Экологик ГТО” дигән мәктәп проектын тормышка ашыру кысаларында махсус значоклар тапшырылды. Чарада Татарстан Республикасы Экология һәм табигать ресурслары министрлыгының Төньяк территориаль идарәсе белгечләре катнашты: алар, укучыларны котлап, экологик әңгәмә үткәрде. “Үз өеңне генә түгел, табигатьне дә пычратырга ярамый. Җир – кешенең гомуми йорты. Ә безнең бурыч – биредә чиста булсын өчен мөмкин булганның барысын да эшләргә тырышу”, – дип мөрәҗәгать итте укучыларга табигатьне саклау белгече Фирдәүсә Латыш. Ул яшь экологларга туып үскән ягыбызның очсыз-кырыйсыз табигатен танып белергә туры киләсен билгеләп үтте. Беренче сыйныф укучыларына балаларның экологик аңын үстерүгә ярдәм итәрдәй раскраска-дәфтәрләр тапшырылды.
Арча 3нче башлангыч мәктәбендә “Экологик ГТО” проектының узган елның сентябреннән тормышка ашырылып килүен искәртик. Пректның максаты балаларның тере һәм тере булмаган табигать турында аң-белемнәрен үстерүдән, экологиягә карата кызыксыну тудыру һәм тулаем әйләнә-тирә мохиткә карата җаваплы мөнәсәбәт булдырудан гыйбарәт. Мәктәп укучылары белән үткәрелә торган чаралар арасыннан – экологик акцияләр, тематик бәйрәмнәр, экологлар белән дәресләр, икенчел чимал җыю, яраксыз материалдан ясалган әйберләр күргәзмәләре һәм кием модалары күрсәтү.