Экологлар Камада гомумтаралган файдалы казылмаларны законсыз чыгаруга киртә куйган
Татарстан Республикасы Экология һәм табигать ресурслары министрлыгының Кама буе территориаль идарәсе инспекторлары Куйбышев сусаклагычы акваториясе буенча рейд ясау барышында закон бозу очрагына тап булган. Документларны тикшерү барышында суда ком-вак таш катнашмасының законсыз чыгарылуы, тәгаенләп әйткәндә, подряд оешмасы белән лицензия хуҗасы арасында килешүле мөнәсәбәтләрнең булмавы ачыкланган. Шулай итеп, 4 мең тонна чамасы ком-вак таш катнашмасы законсыз чыгарылган, ди белгечләр.
Юридик затка карата Административ хокук бозулар турында РФ кодексының 7.3 статьясындагы 1 өлеше (“Җир асты биләмәләреннән лицензиясез генә файдалану”) нигезендә административ беркетмә төзелгән. Закон бозучыга 800 мең сум күләмендә штраф түләргә кирәк булачак.
ТР ЭТРМ матбугат хезмәте