Зәй лагеренда табигать белән аралашу дәресе узды

2019 елның 20 июне, пәнҗешәмбе

Зәй районының “Созвездие” балалар савыктыру лагеренда экологик белем дәресе үткәрелде. Татарстан Республикасы Экология һәм табигать ресурслары министрлыгының Кама аръягы территориаль идарәсе хезмәткәрләре балаларга әйләнә-тирә мохитне кайгыртуның ни өчен бик мөһим булуы, лампочкаларны, градусниклар һәм батареяләрне ничек дөрес итеп утильләштерергә кирәклеге турында сөйләде. Дәрес барышында табигатьне сөюче яшь буын үсемлекләрне бер-берсеннән аерырга өйрәнде, аларның файдасы, дәвалау үзенчәлекләре турында белде, дару үсемлекләрен җыю кагыйдәләренә төшенде. Мавыктыргыч лекцияләр азагында балалар белән асфальтта рәсем бәйгесе, экосумкаларны бизәү буенча мастер-класс үткәрелде.

ТР ЭТРМ матбугат хезмәте