31 май көнне “Байтик” савыктыру-мәгариф комплексында “ЭКОдулкын” IV Яшьләр экологик оешмалары форумы башлана
“ЭКОдулкын” IV Яшьләр экологик оешмалары форумына яшьләр экологик берләшмәләренең һәм студентлар оешмаларының иң актив вәкилләре, экология мәсьәләләре өлкәсендә Татарстан Республикасы экспертлары җыелачак. Чара 31 майдан 1 июньгә кадәр “Байтик” савыктыру-мәгариф комплексында уза. Анда катнашучыларны мәгариф мәйданчыклары, тәҗрибә алышу буенча “Түгәрәк өстәл”ләр, мәдәни-күңел ачу программасы һәм төрле бәйгеләр: фәнни-тикшеренү эшләре, социаль әһәмиятле проектлар һәм “EcoSkills” һөнәри осталык бәйгеләре көтә.
“Экодулкын2019” форумында катнашучыларның түбәндәге мәйданчыкларда булу мөмкинлеге бар:
- Фәнни экология. Төбәкнең биологик төрлелеге белән танышу, табигать ресурсларын саклау һәм энергияне сак тоту проблемалары буенча фикер алышу;
- Социаль экология. Социаль фән буларак, экология, экологиягә зыян китермичә яшәү ни өчен кирәк һәм кем аннан ота;
- Экология һәм белем бирү. Экологик агарту темалары буенча фикер алышу, агарту чараларын үткәрүнең яңа форматлары. Балалар һәм яшьләрне Татарстан Республикасында яшь натуралистлар хәрәкәтен үстерү процессына җәлеп итү;
- Экология һәм медиакиңлек. Экология өлкәсендә медиа-проектлар: телевидение тапшырулары, радиодан чыгышлар, блоггинг, социаль челтәрләр, реклама, һ.б.;
- Экология һәм социаль проектлар. Иҗтимагый оешмаларның һәм физик затларның социаль проектлары бәйгесендә катнашу өчен мәйданчыклар белән танышу;
- Экология һәм калдыкларсыз тормыш. Үз йортыңда экологик көнкүрешне җайга салу, яки калдыкларга ничек итеп яңа “сулыш” өрергә мөмкин.
Чараны оештыручылар – ТР Экология һәм табигать ресурслары министрлыгы ярдәмендә, “Россия студентлар отрядлары” Гомумроссия яшьләр иҗтимагый оешмасының Татарстандагы төбәк бүлеге, ТР “Чиста булачак” Төбәк иҗтимагый оешмасы.
ТР ЭТРМ матбугат хезмәте