“Чиста уеннар” тәмам. Татарстанда 6 тонна чамасы чүп җыеп алынган
Татарстан активистлары “Чиста уеннар” федераль проекты кысаларында 6 тонна чамасы чүп җыйган. Узган ял көннәрендә республикабызның 4 мәйданчыгында уздырылган команда ярышлары нәтиҗәләре буенча Автомобиль төзүчеләр шәһәрендә яшәүчеләр абсолют рекордчыларга әйләнгән. Алар җәмгысе 3 тонна калдык җыеп куйган. Чүпнең күпчелек өлешенә “икенче сулыш” өреләчәк, дип хәбәр итә оештыручылар. Шулай итеп, 610 капчык чүп-чар эшкәртүгә җибәрелгән. Акция кысаларында җыеп алынган барлык калдыкларның 76%ы бу.
Татарстанның “Чиста уен”нарында республикабызда яшәүче 345 кеше катнашкан. Уртак тырышлыклар белән ирешелгәнебез Татарстанга проектта катнашучы төбәкләр рейтингында 7нче урынга чыгу мөмкинлеге биргән.
Россия буенча акциягә 69 шәһәрдә 6 мең кеше кушылган. Барлыгы 90 уен оештырылып, 129 тонна калдык җыеп алынган.
ТР ЭТРМ матбугат хезмәте