Безнең һәркайсыбыз чисталыкта яшәргә омтыла. Экологлар территорияне җыештырырга чыкты
Татарстан Республикасы Экология һәм табигать ресурслары министрлыгы хезмәткәрләре бүген эш атнасын чисталык урнаштырудан башлап җибәрде. Экологлар Министрлык территориясендә кар таратты һәм чүп-чарны җыйды. Безнең һәркайсыбыз чисталыкта яшәргә омтыла – табигый теләк бу, дигән фикердә ведомство белгечләре. “Республикабызда 4 миллионлап кеше яши. Аларның һәркайсы һәр көн саен берәр генә чүпне җирдән алып, тиешле урынга китереп ташласа, тирә-юнебез чистарачакмы? Һичшиксез, чистарачак!” – ди экологлар.
Әйтергә кирәк, җәй алдыннан республикабызның барлык районнарында территорияләрне чистарту буенча шимбә һәм чәршәмбе өмәләре уздырылып килә. Санитария-экология икеайлыгы кысаларында табигатькә битараф булмаган барча кеше территорияләребезне чистарту эшенә кушыла ала.
ТР ЭТРМ матбугат хезмәте