Яшел отрядлар. Greent республика бәйгесендә 27 команда катнаша
Яшьләрнең ихтыяри эко-отрядлары тормышта экологиягә сакчыл карашны популярлаштыруны дәвам итә. Greent бәйгесендә катнашучылар – 12 яшьтән 18 яшькә кадәрге үсмерләр, командаларга берләшеп, яшьтәшләре өчен икенчел чималны җыю буенча акцияләр һәм эко-квестлар оештырып килә. Шулай итеп, алар үзләре белән бер мәгариф учреждениеләрендә белем алучыларны әйләнә-тирә мохиткә карата сакчыл мөнәсәбәткә өйрәтә. Бүгенгә республика бәйгесендә катнашу өчен төрле төбәкләрдән: Казаннан, Түбән Кама, Ютазы, Мамадыш, Мөслим һәм Татарстанның башка районнарыннан 27 команда теркәлгән.
“Бәйгедә катнашучылар өчен биремнәр планы эшләнде: мәсәлән, хәзер өченче этап кысаларында “Валли и Лоракс” мультфильмын, “История вещей” һәм “Экологический след человека” фильмнарын карап, алар буенча фикер алышу булачак, ә инде апрель аенда безне йомгаклау тантанасы көтә”, – ди бәйге җитәкчесе, “ДОМ” Экоүзәге мөдире Дмитрий Спиридонов.
Greent бәйгесендә катнашучыларның видеоязмалары һәм фотосурәтләре белән “Вконтакте” төркемендә (https://vk.com/young_eco_tatarstan) яки Инстаграммда (#юныеэкологиРТ #РДШРТ #РЦВР #ГДЭБЦ #GreenT #экобиоцентррф хэштэглары аша үтеп) танышырга була.
Бәйге Казан ш. Балаларның шәһәр экология-биология үзәге тарафыннан, Татарстан Республикасы Мәгариф һәм фән министрлыгы ярдәмендә, Республика мәктәптән тыш эшләр үзәге белән берлектә уздырыла.
ТР ЭТРМ матбугат хезмәте