Башкортстанның тарнспорт компаниясе Әлмәт складында тиешле таләпләрне бозуга юл куйган өчен 400 мең сум штраф түлиячәк
Туфракны саклау таләпләрен санга сукмау Башкортстанның транспорт компаниясе өчен шактый ук кыйммәткә төшкән – моның өчен аңа 400 мең сум күләмендә штраф түләргә туры киләчәк. Әлмәт шәһәре сәүдә-сатып алу базасы территориясендә тиешле таләпләрне бозган өчен ТР Экология һәм табигать ресурслары министрлыгының Көньяк-Көнчыгыш территориаль идарәсе инспекторлары юридик затны административ җаваплылыкка тарткан. Склад бүлмәсен арендага алып торган компания узган елның апрелендә аннан чыгып киткән. Үзе чыгып киткән-китүен, тик техник күкерт тутырылган капчыкларны гына “онытып” калдырган. Шулай итеп, әлеге “оныту” 4 класс хәвефле калдыкларның 11 кв.м мәйдандагы туфракны пычратуына китергән. Экологлар әлеге факт буенча компаниягә карата ТР Административ хокук бозулар кодексының 8.7 статьясындагы 2 бүлеге (“Җирләрне яхшырту, саклау, туфракны җилдән, судан ашалудан һәм башка процесслардан саклау һәм җирләрнең торышын начартуга китерердәй әйләнә-тирә мохиткә башка төрле тискәре йогынтыдан саклау буенча билгеләнгән таләпләрне һәм мәҗбүри чараларны үтәмәү”) нигезендә административ җәза билгеләү турында карар чыгарылган.
ТР Экология һәм табигать ресурслары министрлыгы матбугат хезмәте