Балалар һәм экология. 1 мартка кадәр “Табигатьне сакла!” плакатлар бәйгесенә гарзалар кабул ителә
Сабый күңеле изгелеккә тартыла икән, иң элек аңа экологик тәрбия бирә башлау кирәк. Балаларга табигатьнең үзләренә караганда көчсезрәк булуларын, шуңа күрә аны сакларга, якларга, аның турында кайгыртырга кирәклеген күрсәтү-аңлату мөһим. Л.Н.Толстойның “Ясная Поляна” музей-утары” дәүләт мемориаль һәм табигый тыюлыгы, экологик тәрбия максатыннан чыгып, “Табигатьне сакла!” дигән темага балалар арасында халыкара иҗат бәйгесе – плакат бәйгесе үткәрә. Чараны оештыручылар билгеләп үткәнчә, “Җир йөзендә экология, хайваннарны һәм әйләнә-тирә мохитне саклау, кеше һәм табигатьнең үзара йогынтысы, гомумән, тормыш кагыйдәләре һәрвакыт бик мөһим әйберләр булып тора. Ә инде рәсем дөньяга карата дөрес мөнәсәбәтне бик ачык һәм җиңел күрсәтә. Шунысы да бар: үзе ясаган әйберләр бала аңында яхшырак сакланып кала.”
Плакатлар һәм флайерлар 2019 елның 1 мартына кадәр кабул ителә. Рәсемнәр акварель буяулар, төсле карандаш, пастель, тушь яки графит ярдәмендә эшләнгән булырга мөмкин. Бу хакта тәфсиллерәк мәгълүматлар белән сайтта (http://ypmuseum.ru/ru/novosti/4016-12-09-2018.html) танышырга була.
Бәйгедә җиңүчеләр грамоталар һәм истәлекле бүләкләр белән бүләкләнәчәк. Теләсә кайсы яшьтәге бала анда катнашуга гариза тапшырырга мөмкин.
ТР Экология һәм табигать ресурслары министрлыгының матбугат хезмәте