Бөгелмә районында нефтьне туфракка агызу факты буенча тикшерү алып барыла
«Автозаправка станциясе янында нефть продуктлары туфракка түгелә", - Бөгелмә районының табигатьне саклау буенча җәмәгать инспекторыннан экологларга шундый хәбәр килде. Татарстан Республикасы Экология һәм табигый ресурслар министрлыгының Көньяк-Көнчыгыш территориаль идарәсе инспекторлары әлеге урынга чыгып табигать саклау законнары бозылу фактын раслады.
"Әлеге хәл арматура тамагында герметизациягә хилафлык килү нәтиҗәсендә килеп чыккан. Аның мәйданы 50,5 кв. м. тәшкил итә. Закон бозу очрагы оператив рәвештә бетерелде", - дип сөйләде дәүләт инспекторы Ләйсән Шәйдуллина. Шулай ук табигать саклау ведомствосы белгечләре пычранган урында туфрактан проба алды. Прокурор йогынтысы чараларын күрү өчен барлык материаллар Татарстан районара табигать саклау прокуратурасына тапшырылды.
ТР ЭТРМ матбугат хезмәте