Техника эше. Гамәлгә кертелгән программа-аппарат комплексы инспекторлар эшен камилләштерде
Экология хезмәтендәге инновацияләр. Татарстан Экология һәм табигый ресурслар министрлыгының территориаль идарәләрендә "Экокүзәтчелек" программа-аппарат комплексы кертелде. Техник яңалык материалларны урында рәсмиләштерү мөмкинлеген бирә һәм документлар төзү вакытын кыскарта. Планшетка урнаштырылган программа ярдәмендә дәүләт инспекторы урында акт төзи һәм хокук бозу очрагы ачыкланган очракта – административ беркетмә рәсмиләштерә. Биредә үк документ кәгазьдә чыгартыла, ә ачыкланган хокук бозу турындагы белешмәләр бердәм базага җибәрелә.
Әйтик, мисал өчен, Төньяк территориаль идарәдә программа продуктыннан файдаланганда табигать саклау законнарын бозу турында 17 акт, 10 беркетмә, 7 карар төзелде.
"Экокүзәтчелек" программа комплексы Татарстан Республикасының Мәгълүматлаштыру һәм элемтә министрлыгы белән бергә эшләнде.
ТР ЭТРМ матбугат хезмәте