Ялтада Федераль экологик совет утырышы булып узды

Кырым республикасының Ялта шәһәрендә Федераль экологик советның “Экологик мониторинг системасын үстерүнең төп юнәлешләре” дигән VI күчмә утырышы үткәрелде. Утырышта Россия табигый байлыклар һәм экология министры урынбасары Морат Кәри­мов, Табигатьтән файдалану өлкәсендә күзәтчелек федераль службасы җитәкчесе Артем Сидоров, Экология, табигатьтән файдалану, агроиндустрия һәм азык-төлек политикасы комитеты рәисе Таһир Һадиев, Татарстан экология һәм табигый байлыклар министры Фәрит Габделганиев, Россия Табигать министрлыгы, региональ табигать саклау тармак­лары, Росгидромет вәкилләре катнашты.

“Татарстан Республикасында инструменталь һәм исәп-хисап экологик мониторингы системаларын төзү турындагы” доклад белән Татарстан экология һәм табигый байлыклар министры Фәрит Габделганиев чыгыш ясады. – Татарстанның әйләнә-тирәлеген күзәтү­нең территориаль системасы 8 заманча стационар эко-аналитик лабораториядән, 16 атмо­сфера һавасы пычрануга автоматик контроль станциясеннән, 6 күчмә экологик лаборато­риядән, “Фламинго” экологик анализ һәм патруль судносыннан, 3 катердан тора. Атмо­сфера һавасын күзәтүләр республикада 123 ноктада башкарыла, елына 2 миллионнан артык анализ ясала, контроль автоматик режимда өзлексез алып барыла. Өске суларның торышына 37 су объектындагы 71 пунктта даими контроль ясала. Шулай ук 60 су объ­ек­тындагы 132 юынты сулар агызу ноктасына күзәтчелек ителә. Ел эчендә 39 мең су проба­сы анализлана.

Хәзерге вакытта Татарстан Экология министрлыгы су объектларына су кулланучы­лардан су куллану документлары шартларын үтәү турындагы хисаплар белән керә торган локаль мониторинг белешмәләрен берләштерү мәсьәләсен өйрәнә. Өске суларның пычра­нуына оператив контроль ясау өчен “Фламинго” патруль һәм эко-аналитик контроль суд­носы кулланыла. Анда урнаштырылган җиһазлар өске суларның сыйфатына гидрохимик һәм гидрофизик күрсәткечләр буенча контроль ясарга, эколокация кулланып су төбен һәм су катламын капшарга, юынты сулар агызуның төгәл урынын билгеләргә, арытаба стацио­нар лабораториядә анализлау өчен су һәм төпке утырымнар пробалары алырга мөмкинлек бирә. Төрле чыганаклардан алынган мониторинг белешмәләре “Татарстанның экологик карта­сы” геоинформатик системасына туплана. Бу исә экологик хәлне начарайтучы фак­торларны комплекслы ачыкларга һәм бәяләргә булыша. “Татарстанның экологик карта­сы”ның бер төп бурычы булып әйләнә-тирәлекнең сыйфаты турындагы белешмәләрне визуализацияләү һәм күзәтчелек эшләрендә турыдан-туры куллану тора. Картада хисаплар һәм графиклар рәвешендә төрле тирәлекләргә күзәтчелек йомгаклары турында белешмә­ләр чагыла.

Экология министры әйләнә-тирәлеккә күзәтчелекнең территориаль системасын арытаба үстерү кысаларындагы 2017 елгы өстенлекле бурычларны да атап үтте. Мәсәлән – 2018 елда Бөтендөнья футбол чемпионатын әзерләп үткәрү чорында экологик куркынычсыз­лыкны тәэмин итү өчен берничә өстәмә АСКЗА сатып алып урнаштыру. АСКЗА урнаш­тыру Казанның зур территориясен атмосфера һавасы сыйфатына тәүлек буе өзлексез кон­троль белән капларга мөмкинлек бирә. Шулай ук әйләнә-тирәлектәге химик кушылмалар­ны таныклау буенча “Хроматэк-Кристалл 5000” хроматографы базасындагы аппарат-про­грамма комплексы сатып алынган.

Утырышта катнашучылар шулай ук экологик мониторинг системасын үстерү перс­пек­тиваларын, дәүләти экологик күзәтчелек фондын төзү концепциясен, автоматик эко-күзәт­челек системасын иңдерү һәм куллануга техник таләпләрне регламентлаучы норматив-методик базаны камилләштерү мәсьәләләрен тикшерде.

ТР ЭТБМ матбугат хезмәте