Рөстәм Миңнеханов җитәкчелегендәге дисциплинаара команда Зәңгәр күлләр территориясендәге эшләрнең барышы белән танышты
Бүген Татарстан Республикасы Рәисе Рөстәм Миңнеханов «Зәңгәр күлләр» махсус саклана торган табигый территориясен алга таба үстерү мәсьәләләре буенча күчмә киңәшмә уздырды. Казан халкы һәм кунаклары арасында популяр булган табигать һәйкәле антропоген һәм рекреацион йөкләнеш кичерә башлады. Хәзерге вакытта табигатькә сакчыл караш белән туристлар өчен уңайлы шартлар тудыру планлаштырыла. Проект өстендә зур дисциплинаара команда эшли, аның составында экологиядән башлап территорияне алга таба идарә итүгә кадәр төрле өлкәләрдән белгечләр бар.
Рөстәм Миңнехановка Зур һәм Кечкенә Зәңгәр күлләрне төзекләндерү буенча чаралар, Казансу елгасына төшү һәм су коену өчен яңа урыннар тәкъдим иттеләр. Аерым алганда, соңгылары суның үзлекләрен югалтуга юл куймаслык итеп җиһазландырылган, күлләр төбе һәм ләме тигез кала, Зәңгәр күлләр экосистемасы бозылмый.
Исегезгә төшерәбез, 2025 елга кадәр Зәңгәр күлләр экосистемасын үстерү концепциясе ТР Рәисе Рөстәм Миңнеханов кушуы буенча эшләнгән. Аерым алганда, ул сакланган территорияләргә керү өчен оештырылган урыннар булдыруны күздә тота: машина кую урыны, актив ял итү өчен җиһазлар алып тору белән павильон, каты көнкүреш калдыклары контейнерлары. Шулай ук белем бирү һәм интерактив элементлары булган туристлар өчен экосукмаклар оештырылачак.