«Зыян салма, зыяны да булмас!» Экология министрлыгы инспекторлары традицион экодәресләрне дәвам итәләр
Экология министрлыгының Идел аръягы идарәсе инспекторлары Буадагы «Илһам» ислам үзәгендә булып, экологик дәрес үткәрделәр. Дәрес татар телендә узды, ә төп тема-мөселман мәдәнияте өлеше буларак табигатькә карата кайгыртучан мөнәсәбәт. «Зыян салма, зыяны да булмас!» - әмерләрнең берсе шундый, ул инде төрле дин һәм конфессия кешеләрен берләштерүче әхлакый ориентир булып киткән. Мөселман мәдәниятендә, дөньяның башка мәдәниятләрендәге кебек үк, табигатьне яратырга һәм сакларга, суга сак карарга, чишмәләрне һәм сулыкларны пычратмаска өйрәтәләр.
Балалар экологларга үзләренең әйләнә-тирә дөньяга яхшы мөнәсәбәтләре турында сөйләделәр. Кыш буе балалар кошларны ашаталар, ә яз җитү белән ояларны яңарталар һәм яңаларын элеп куялар, йортсыз хайваннар турында кайгырталар. «Илһам» үзәгендә куяннар, тутый кошлар, ташбакалар яшәгән үзләренең тере почмаклары да бар. Монда һәр хайванның үз исеме һәм үз характеры. Мәсәлән, куян Гоша тере почмакның иң тынгысыз яшәүчесе, кунаклар белән танышырга һәм балаларның кулларында утырырга ярата. Балаларның барысы да өйләрендә йорт хайваннарын тота алмый. Шуңа күрә йорт хайваннары белән аралашу балаларда җаваплылык, кайгырту, дүрт аяклы дусларга мәхәббәт хисләре уята. Экология министрлыгы инспекторлары: «Хайваннар турында кайгыртучы балалар игелекле, кайгыртучан, игътибарлы булып үсә, беркемгә дә зыян китерә алмый. Шуңа күрә тере почмак бик мөһим тәрбия функциясен үти». Моннан тыш, хайваннар кешедә һәрвакыт яхшы кәеф тудыралар, шуңа күрә бу шулай ук психологик бушану бүлмәсе дә. Экодәрес истәлегенә барлык балалар да Экология министрлыгыннан бүләкләр алдылар.