Узган атнада Министрлык тарафыннан Казанның төньяк зонасында күкертле водород буенча 10 артып китү очрагы ачыкланган
18-25 август көннәрендә «Салават Күпере» микрорайонында И.Шакиров урамында урнашкан АСКЗА-5 станциясендә 2,5 ПДК максималь тапкырлыгы белән күкерт водороды буенча чик дәрәҗәдә рөхсәт ителгән матдәләр артып китүнең 10 очрагы ачыкланган. Бер атна элек, 11-18 август көннәрендә, күкерт водороды буенча 72, углерод оксиды буенча артып китүләрнең 5 очрагы ачыкланган булган.
Казанда урнашкан Министрлыкның башка станцияләрендә пычраткыч матдәләрнең андый арту очраклары теркәлмәгән.
Шулай ук, халык үтенече буенча, экологлар матдәләрнең киңрәк исемлеге буенча анализлау өчен кул насосы ярдәмендә пробалар да сайлап алганнар. Бу анализ нәтиҗәләре берничә көннән билгеле булачак.
Исегезгә төшерәбез, Казанда атмосфера һавасының сыйфатына кагылышлы мәсьәләләрне Экология министрлыгы бу атнада һәм калдыклар белән эш итү мәсьәләләре буенча түгәрәк өстәл утырышында күтәрде, чөнки 2022 ел ахырыннан ведомствога Казанның төньяк зонасында атмосфера һавасының канәгатьләнерлек булмаган торышы буенча гражданнарның күпсанлы мөрәҗәгатьләре килеп тора. Автомат контрольлек станцияләре теркәүче пычраткыч матдәләрнең артуы күзәтелә. Барлык арту очракларының 80% – күкерт водороды. Барлык теркәлгән артулар турында мәгълүмат Роспотребнадзорның Татарстан Республикасы буенча идарәсенә, Росприроднадзорның Идел-Кама төбәкара идарәсенә һәм Казан районара табигатьне саклау прокуратурасына җибәрелә.
Бу мәсьәлә Росприроднадзор башлыгы Светлана Радионова контролендә.
«Казанда яшәүчеләрдән шәһәрдәге пычрак һава турында күп шикаятьләр алынды. Моңа җавап итеп, без потенциаль пычрану чыганаклары — «УК ПЖКХ» ҖЧҖ, «ТГК-16» АҖ, «Казаноргсинтез» ГАҖ, «Ак Барс» кошчылык комплексы» ҖЧҖ һәм «Этилен үткәргечләр идарәсе – Түбән Кама Нефтехим» ҖЧҖ тикшердек.
Тикшерү нәтиҗәләре буенча ачыкланган хокук бозуларны бетерү турында күрсәтмәләр бирелде, гаепле затлар административ җаваплылыкка тартылды. НВОС өчен 18 млн сумнан артык түләүне өстәмә исәпләү турында таләпләр куелды. Табигатькә зыян 28 млн сумнан артып китә.
«Казаноргсинтез» ГАҖдә атмосфера һавасын саклау өлкәсендә тупас бозулар ачыкланды. Тикшерү материаллары чаралар күрү өчен табигать саклау прокуратурасына җибәрелде. Хәлне контрольдә тотабыз», – дип хәбәр итте Светлана Геннадьевна үзенең Telegram-каналында.